ARESTADO ang dalawang scavenger na umano’y nanuntok at namalo ng martilyo sa ulo ng lalaking sumita sa pagsisiga nila sa tabi ng kanyang tindahan noong Huwebes sa Valenzuela City.

Nadakip ng mga tauhan ni Valenzuela police chief P/Col. Nixon Cayaban ang mga suspek na sina alyas Baduso, 27; at alyas Castro, 35.

Ayon kay Col. Cayaban, lumabas ng kanyang tindahan ang biktima nang mapuna ang pagsisiga ng mga suspek sa kanto ng Libiran St. at McArthur Highway, Malanday para sitahin.

Nang tumalikod ang biktima papasok ng tindahan, sinuntok na siya sa likod ni Baduso at hinataw naman ng martilyo sa ulo ni Castro.

Nabawi ng mga pulis sa mga suspek ang martilyo at nahaharap sa kasong attempted murder.