SWAK sa selda ang isang kelot na armado ng baril at lasing matapos magwawala sa kalye at manghamon ng away sa bawat makasalubong nito sa panulukan ng Arellano Avenue at Cadena De Amor Street, Malate,Manila, Martes ng umaga.

Agad rumesponde ang punong barangay sa lugar kasama ang mga tauhan ng Arellano Police Community Precinct sakop ng Malate Police Station 9 ng Manila Police District.

Ayon sa report ng pulisya, ang suspek na nakilalang si alyas Jerome, 26, tambay ng Waling Waling Street, Malate, ay armado ng kalibre 38 na baril at kargado ng dalawang bala.

Ang dalawa umanong kasama nito ay dinampot din ng mga awtoridad. Sila ay nakilalang sina alyas Erwin, 22 ,construction worker,at Romano, 30, tricycle driver.

Batay sa imbistigasyon ni Police Lieutenant Colonel Nelson Cortez, nakainom ang tatlong lalaki. Sa kanilang paglalakad ay nagwala umano ang mga ito at naghamon ng away sa bawat madaanan.

Rumesponde sina Police Staff Sargent Reineer Lacastre kasama ang mga tauhan ng tactical Motorized Riding Unit (TMRU) sa pangunguna ni Police Lieutenant Renen Malonzo,hepe ng Station Investigation Division Management Branch ( SIDMD).

Nahaharap si Jerome sa kasong paglabag sa Republic Act 10591 (Comprehensive Law on Firearms and Ammunition) at Alarm and Scandal.