LUMAGDA sa isang memorandum of understanding (MOU) ang Pilipinas at Australia para sa pagpapatupad ng “Work and Holiday” visa arrangement kung saan ang citizen ng dalawang bansa ay papayagang magtrabaho habang nakabakasyon upang magkaroon ng pansamantalang pagkakakitaan.

Sa ilalim ng MOU na nilagdaan nina Foreign Affairs Secretary Enrique Manalo at Australian Ambassador to the Philippines Hae Kyong Yu pinaboran ng dalawang bansa ang pagbibigay ng multiple entry visa sa mga Pilipino at Australian upang makapagtarabaho habang nakabakasyon ng hindi hihigit ng isang taon.

Ang paglagda sa MOU ay ginawa ng bumisita si Australian Prime Minister Anthony Albanese sa Malacañang noong Biyernes, Setyembre 8.

“The Participants mutually decide to establish a ‘Work and Holiday’ visa arrangement, to allow nationals of both Participants to stay in the territory of the other Participant for the primary purpose of a holiday, during which they may undertake work to supplement the cost of their stay,” sabi sa MOU.

Ang mga maaaring bigyan ng Work and Holiday visa ay mga edad 18 hanggang 31 lamang, nakapagtapos ng tertiary education o nakakompleto ng dalawang taong undergraduate study o post-secondary education.

Dapat din ay pumasa sa health, character, at national security requirement, at mayroon medical at health insurance sa panahon ng bakasyon.

“Each participant may deny any particular application for a ‘Work and Holiday’ visa it receives, in accordance with its domestic laws and regulations,” sabi pa sa MOU.

“Nationals of one participant who have been granted a ‘Work and Holiday’ visa under this Memorandum of Understanding may be denied entry or removed from the territory of the other participant in accordance with the laws and regulations of that participant.”

Ang mga Work and Holiday visa holders ay sasaklawin din ng diplomatic labor law ng host country.