JAEN, Nueva Ecija–Hawak na ng Nueva Ecija police ang getaway vehicle ng gunman ni Mark Vic “Macmac” Pascual, ang barangay captain ng Brgy. Don Mariano Marcos na pinatay noong Nob. 13.
Na-recover ang silver Hyundai Accent (NDX-4667) sa residential compound sa Camia St., Brgy. Mayapyap Norte, Cabanatuan City dakong alas-7:40 ng gabi noong Lunes.

Ayon kay Nueva Ecija police chief Col. Ferdinand D. Germino, natunton ang getaway vehicle matapos rebisahin at sundan ang mga footage ng CCTV na dinaanan nito mula sa Jaen hanggang sa Cabanatuan City.

Napag-alaman din na AWOL (Absent Without Official Leave) ang nakatira sa bahay na sinalakay sa tulong ng search warrant.

Ayon kay Lt. Col. George Caluad, SITG operations leader, hindi natagpuan ang AWOL na pulis nang isagawa ang operasyon sa lugar.

Nakarehistro sa pangalan ng babae na taga-Bacoor, Cavite ang kotse, ayon sa ulat.

Ayon kay Caluad, kasalukuyan pa silang nakikipag-coordinate sa Highway Patrol Group upang malaman ang ibang detalye ukol dito.

Nakuha mula sa Hyundai Accent ang isang cal. 45 pistol, limang bala ng cal.45, isang magazine at center mirror dashcam.

Nasamsam naman sa bahay ng AWOL na pulis ang isang granada; 5 gramong shabu na nagkakahalaga ng P34,000 at isang red Marlboro case.