BACOLOD CITY – Pansamantalang ipinagbawal ng Regional Task Force (RTF) Kanlaon ang pagpasok sa loob ng anim na kilometrong pinalawig na danger zone ng Bulkang Kanlaon tuwing partikular na oras ng araw simula Martes.

Ayon sa abiso nitong Lunes mula sa RTF Kanlaon na pinamumunuan ng Office of Civil Defense, nakapagtala ang Philippine Institute of Volcanology and Seismology (Phivolcs) ng 67 lindol na may kaugnayan sa bulkan, sulfur dioxide emission na 755 tonelada kada araw, at usok na umabot sa taas na 950 metro – makapal, tuloy-tuloy ang pagbuga, at lumilipad pa-hilaga at hilagang-silangan, mula alas-5 ng umaga ng Linggo hanggang alas-5 ng umaga ng Lunes.

“Dahil dito, ang pagpasok sa loob ng 6-km extended danger zone, mula alas-6 ng umaga hanggang alas-4 ng hapon, para sa pagsasaka at iba pang mahahalagang gawain, ay pansamantalang ipinatitigil simula Hunyo 24 hanggang sa susunod na abiso,” ayon sa RTF Kanlaon.

Nananatili sa Alert Level 3 ang Bulkang Kanlaon mula nang sumabog ito noong Disyembre 9, na nagpapahiwatig ng “nagsimula na ang pagputok ng magma at maaaring magtuloy sa mas malalakas pang pagsabog.”

Dahil dito, inilikas ang mga residente sa loob ng pinalawig na 6-kilometrong danger zone.

Ang bayan ng La Castellana sa Negros Occidental ang pinakaapektado, kung saan may pinakamaraming evacuees mula sa hindi bababa sa limang barangay.

Sa Negros Occidental at Negros Oriental, aabot sa 6,040 katao o 1,883 pamilya ang nananatili sa 20 aktibong evacuation centers, habang 10,559 katao o 3,294 pamilya naman ang pansamantalang nanunuluyan sa mga kamag-anak o kaibigan, batay sa datos ng Department of Social Welfare and Development noong Hunyo 21.

Inirerekomenda ng Phivolcs na patuloy na lumikas ang mga komunidad sa loob ng 6-km radius mula sa bunganga ng bulkan dahil sa panganib ng pyroclastic density currents, pagbuga ng bato, pag-ulan ng abo, pagbagsak ng bato, at iba pang kaugnay na panganib. Philippine News Agency