PINURI ni Bureau of Immigration (BI) Commissioner Joel Anthony Viado ang ligtas na pagbabalik ng isang Pilipinong biktima ng human trafficking, matapos na makaalis ng bansa gamit ang pekeng pagkakakilanlan sa trabaho.

Ang 31-taong gulang na biktima, na umalis ng Pilipinas noong Agosto 2024, ay nakabalik noong Nobyembre 5 sakay ng Philippine Airlines mula Cambodia.

Kinumpirma ng Immigration Protection and Border Enforcement Section (I-PROBES) ng BI na nagkunwari ang biktima bilang empleyado ng isang travel agency na papunta sa Malaysia para sa maikling biyahe sa trabaho. Subalit pagdating doon, siya ay dinala sa Cambodia kung saan siya inupahan bilang Customer Service Representative (CSR) ng isang umano’y e-commerce company na humahawak ng account sa Estados Unidos (US). Sa halip, napilitang makilahok siya sa isang sindikato ng panloloko sa rehiyon.

Ayon sa kanyang salaysay, itinalaga siya sa grupong tumatarget ng mga biktimang nasa gitnang edad sa US at Europa. Ang hindi pagtupad sa quota ay may mabigat na kaparusahan.

“Nang lumaon ay natuklasan ng biktima na higit pa sa simpleng hindi pagpapakain ang parusa; siya ay dumanas ng torture gaya ng matagal na pagpapa-squat, pagkakakuryente, at matinding pagkabilad sa araw,” pahayag ni Commissioner Viado.

Bagama’t ilang ulit siyang nagtangkang magbitiw, hindi siya pinayagang umalis ng kanyang mga amo dahil sa ipinataw na US$ 5,000 na bond. Sa kabutihang-palad, nakialam ang Embahada ng Pilipinas sa Cambodia upang siya ay matulungan.

Binigyang-diin ni Viado na ang insidenteng ito ay nagsisilbing paalala sa panganib ng hindi beripikadong online recruitment.

“Bagama’t maaaring magbigay ng oportunidad ang online recruitment, ipinapakita ng kasong ito na dapat mag-ingat nang husto ang mga Pilipino sa pagtanggap ng alok na trabaho sa ibang bansa, lalo na kung may hinihinging paunang bayad o kakaibang kondisyon,” aniya.

Nagpahayag ng pasasalamat ang BI sa National Alliance of International Filipino Air Traffic Technicians (NAIAFFAT) at sa Overseas Workers Welfare Administration (OWWA) sa kanilang maagap na suporta at paggabay sa pagbabalik ng biktima.