NAKAPAGDAGDAG ang Pilipinas ng record na 794 megawatts ng renewable energy capacity noong 2024, ngunit nananatili ang mga kakulangan sa distributed energy, net metering, permitting, at grid readiness na nagpapabagal sa clean-energy transition ng bansa, ayon kay Senadora Pia S. Cayetano.

Binanggit ni Cayetano, chairperson ng Senate Committee on Energy, ang datos sa pagbubukas ng pagdinig ng komite noong Abril 30 sa mga panukalang magpapalawak sa paggamit ng renewable energy sa government offices at magpapahusay sa implementasyon ng Renewable Energy Act of 2008.

“In 2024 alone, the country added a record 794 megawatts of renewable energy capacity, more than the combined additions from the previous three years,” ani Cayetano sa kanyang opening statement.

Sa kabila ng pag-usad, sinabi ni Cayetano na may mga kakulangan pa rin sa pagpapalawak ng renewable energy sa bansa, partikular sa distributed energy, net metering options, permitting efficiency, at grid readiness.

Tinalakay sa pagdinig ang mga panukalang naglalayong obligahin o hikayatin ang paggamit ng renewable energy systems sa government offices, kabilang ang solar rooftop at iba pang clean energy systems.

Tinalakay din ng komite ang mga panukalang amyenda sa Renewable Energy Act, kabilang ang mga hakbang para palakasin ang net metering at tugunan ang mga hadlang sa clean energy development.

Sinabi ni Cayetano na mahalaga ang pagdinig dahil patuloy na nakadepende ang Pilipinas sa fossil fuels.

Ayon sa senadora, nasa 80% pa rin ng power generation mix ng bansa ang fossil fuels, habang nasa 21% hanggang 22% lamang ang renewables.

Sinabi rin ni Cayetano na lantad ang bansa sa pabago-bagong presyo ng global fuel na dulot ng mga panlabas na salik na hindi kontrolado ng Pilipinas.

Binanggit niya ang mga projection na maaaring umabot sa P9 kada kilowatt-hour ang presyo ng kuryente sa Wholesale Electricity Spot Market, halos doble kumpara sa pre-conflict levels.

“Against this backdrop, renewable energy is no longer just an environmental goal. It is an energy security imperative,” ani Cayetano.

Sinabi niya na dapat manguna ang pamahalaan sa paggamit ng renewable energy systems sa mga tanggapan ng gobyerno.

Kabilang sa mga panukalang tinalakay ang Senate Bill No. 457, o Renewable Energy in Government Offices Act na inihain ni Senador Rodante Marcoleta; Senate Bill No. 702, o Increasing Utilization of Renewable Energy in Government bill ni Senador Lito Lapid; at Senate Bill No. 1635, o Renewable Energy in Government Offices bill ni Senadora Camille Villar.

Kasama rin sa mga tinalakay ang mga panukala sa solar rooftop adoption at renewable energy reforms nina Senador Jose “Jinggoy” Estrada, Senador Sherwin Gatchalian, Senadora Imee Marcos, Senador Lito Lapid, at isang resolusyon ni Senador Robin Padilla.

Sinabi ni Cayetano na kaugnay din ng renewable energy ang poverty reduction, abot-kayang enerhiya, disenteng trabaho, reduced inequality, at sustainable communities dahil naaapektuhan ng presyo ng kuryente ang kabahayan, trabaho, edukasyon, at pang-araw-araw na pamumuhay.

Ayon kay Cayetano, rerepasuhin ng komite ang mga nakabinbing panukala bilang bahagi ng paghahanap ng paraan upang maging mas accessible, reliable, at tugma sa energy security needs ng bansa ang renewable energy.