NAARESTO ng mga agents ng National Bureau of Investigation– Human Trafficking Division (NBI-HTRAD) ang isang suspek sa paglabag sa RA 9995 (Anti-Photo and Video Voyeurism Act of 2009), RA 9262 (Anti-Violence Against Women and Their Children Act of 2004), grave threats at grave coercion sa hotel sa Sta. Cruz, Manila kamakailan.

Ang biktima ay dating kasintahan ng suspek at nagsampa ng reklamo nang magbanta ang suspek na magpapakalat ng mga sensitibong video sa kanya sa kanyang pamilya at mga kaibigan maliban kung pumayag siyang makipag-ugnayan at makipagtalik sa kanya.

Inutusan ng suspek ang biktima na makipagkita sa kanya noong Hunyo 2 at tiniyak na ide-delete ang mga sensitibong video na nakaimbak sa kanyang cellular phone.

Doon na nahuli ang suspek at narekober ang mga kaukulang ebidensya.

Ayon kay NBI director Melvin Matibag, ang NBI ay nananatiling nakatuon sa pagprotekta sa mga biktima ng online na sekswal na pang-aabuso at pagsasamantala.