SINABI ni dating kalihim ng Katarungan at kasalukuyang kinatawan ng Mamamayang Liberal (ML) Party-list na si Leila de Lima noong Miyerkules na ang pagbubukas ng mga rekord sa buwis ni Bise Presidente Sara Duterte sa panahon ng pre-trial ay makatutulong upang mapabilis ang kanyang impeachment trial sa Senado, na nakatakdang magsimula sa Hulyo 6.

“Dahil nasa yugto na tayo ng pagmamarka ng mga ebidensiya (marking of exhibits), ito ang tamang panahon upang mabuksan na rin marahil iyon upang magkaroon ng imbentaryo ng mga nilalaman ng partikular na kahon ng BIR (na naglalaman ng mga tax return ng Bise Presidente),” ani De Lima sa mga mamamahayag.

“Sa tingin namin, makatutulong din ito sa mas mahusay at mas mabilis na pagsasagawa ng paglilitis kung mabubuksan na rin iyon ngayon habang nasa yugtong ito ng pre-trial,” dagdag niya.

Ayon kay De Lima, na kabilang sa pangkat ng mga tagausig ng Kamara, ang pagbubukas sa selyadong kahon ng Bureau of Internal Revenue (BIR) na may kaugnayan sa mga rekord sa buwis ng Bise Presidente ay isa sa mga mungkahi ng prosekusyon sa kanilang manifestation na isinumite sa impeachment court.

Sinabi niya na maaaring humingi ng pahintulot ang kalihim ng Senado, na siya ring clerk of court ng impeachment court, mula sa hukuman o sa namumunong opisyal nito upang mabuksan ang selyadong kahon ng BIR.

“Sa tingin ko, kailangang humingi ng clearance ang Senate secretary mula sa hukuman o kahit man lamang sa presiding officer tungkol sa selyadong kahon ng BIR,” dagdag niya.

Binigyang-diin niya na kung sa panahon pa ng paglilitis bubuksan ang kahon, magagamit nito ang ilan sa oras ng hukuman.

“Kung hindi ito gagawin ngayon at sa mismong paglilitis pa bubuksan, saka pa lamang ito mamamarkahan bilang ebidensiya kung gagamitin man ng alinman o ng parehong panig. Kaya mas mabuti na habang nagpapatuloy pa ang pagmamarka ng mga ebidensiya sa pre-trial ay mahabol na ang pagbubukas ng selyadong kahon ng BIR upang malaman at maimbentaryo na ang mga laman nito,” paliwanag niya.

Sinabi rin ni De Lima na may karapatan pa ring magbigay ng komento o tugon ang kampo ng depensa ni Bise Presidente Sara Duterte sa mungkahi ng prosekusyon.

“Sigurado akong ang manifestation na iyon ay ire-refer pa rin at may karapatan pa rin ang depensa na tumugon o magkomento sa manifestation na aming inihain,” aniya.

Naalala rin ni De Lima na noong mga pagdinig para sa paglilinaw (clarificatory hearings) kaugnay ng mga reklamong impeachment, nagpasiya ang House Committee on Justice na panatilihing selyado ang kahon ng BIR.

Ginawa ang pasyang ito matapos magpahayag ng pangamba ang mga opisyal ng BIR na ang pagsusuri sa mga dokumento sa buwis sa isang bukas na pagdinig ay maaaring lumabag sa mga proteksiyong pangpribado na ipinagkakaloob sa mga nagbabayad ng buwis sa ilalim ng National Internal Revenue Code.