NANATILING mahigpit ang seguridad sa paligid ng Senado nitong Martes habang pumasok sa ikalawang araw ang impeachment trial ni Vice President Sara Duterte, kasabay ng pagbabantay ng mga pulis sa posibleng kilos-protesta at paggalaw ng mga tao malapit sa kapulungan.

Nag-deploy ang mga pulis sa paligid ng Senado habang patuloy na tinututukan ng publiko ang paglilitis na sinusubaybayan ng mga tagasuporta at kritiko ng Bise Presidente.

Bago pa magsimula ang trial, naghanda na ang Senado ng security at crowd-control measures, kabilang ang mga kaayusan para sa mga tagasuporta, kritiko, guests, media workers at mga miyembro ng publiko na papayagang makapanood ng proceedings.

Nauna nang sinabi ni Senate President Sherwin Gatchalian na naghanda ang Senado para sa iba’t ibang posibleng senaryo habang nagpupulong ang kapulungan bilang impeachment court.

Ang mahigpit na seguridad ay ipinatupad habang tinututukan ng buong bansa ang trial dahil kinasasangkutan ito ng nakaupong Bise Presidente at maaaring makaapekto sa kanyang political future sakaling umabot sa conviction ang Senado.

Nagbukas ang impeachment trial noong Lunes sa ilalim ng mahigpit na police presence, habang may mga kilos-protesta sa labas ng Senado at tinatalakay naman ng senator-judges ang mahahalagang procedural issues sa loob ng chamber.

Pinangasiwaan din ng mga awtoridad ang access sa Senate complex, kung saan tanging authorized persons lamang ang pinayagang makapasok sa mga designated area. May hiwalay na espasyo para sa impeachment court, prosecution, defense, media at guests.

Saklaw din ng security arrangements ang crowd control sa labas ng Senado, kung saan mino-monitor ng mga awtoridad ang posibleng pagkilos ng mga grupong sumusuporta at tumututol kay Duterte.

Nahaharap si Duterte sa mga alegasyong may kaugnayan sa confidential funds, unexplained wealth at umano’y pagbabanta laban sa matataas na opisyal ng gobyerno, bukod sa iba pa. Itinanggi niya ang mga paratang at iginiit na pulitika ang nasa likod ng impeachment case laban sa kanya.

Sa ikalawang araw ng trial, inaasahang lilipat ang proceedings mula sa mga procedural dispute noong unang araw patungo sa unang presentasyon ng ebidensya, kung saan inaasahang tetestigo ang mga opisyal ng National Bureau of Investigation kaugnay ng Article IV ng impeachment case.

Ang Article IV ay tumatalakay sa umano’y pagbabanta laban kay President Ferdinand Marcos Jr., First Lady Liza Araneta-Marcos at dating Speaker Martin Romualdez.

Nagtungo si Duterte sa Senado nitong Martes ngunit inaasahang makikipagpulong lamang sa kanyang mga abogado at hindi personal na dadalo sa proceedings. Sinabi ng kanyang abogado na si Atty. Michael Poa na nagtungo ang Bise Presidente sa Senado upang makipag-usap sa kanyang legal team.

Nagbukas ang trial noong Lunes kung saan nahalal si Senator Francis “Chiz” Escudero bilang presiding officer ng impeachment court sa botong 12-8.

Nauna nang sinabi ni Escudero na 16 na boto ang kailangan upang ma-convict si Duterte, alinsunod sa constitutional requirement na two-thirds vote ng lahat ng miyembro ng Senado.

Inaasahang magpapatuloy ang impeachment court sa ilalim ng trial calendar na maaaring tumagal ng ilang buwan, kaya mananatiling pangunahing usapin para sa Senado at law enforcement agencies ang seguridad, access control at crowd management.

Susubukin din ng proceedings kung paano mapananatili ng Senado, bilang impeachment court, ang kaayusan habang pinapayagan ang public access at media coverage sa kasong tinututukan ng buong bansa.