Tiyahin unang tinigok ng suspek

ISANG construction worker na nagsabing nalulong siya sa droga ang sumuko noong nakaraang linggo sa pulisya sa Bayombong, Nueva Vizcaya at umamin sa pagpatay sa isang babae at sa 11-anyos nitong pamangkin noong Setyembre 1, ayon sa ulat na isinumite noong Lunes kay Philippine National Police chief General Jose Melencio C. Nartatez Jr.

Ang suspek na gumagamit ng alyas na Wendel, 30, at residente ng Barangay La Torre South sa bayan ng Bayombong, ay dinala rin ang mga tauhan ng Bayombong Municipal Police Station sa isang bakanteng lote malapit sa isang resort sa Barangay Ipil Cuneg, kung saan inilibing ang katawan ng bata, ayon kay Police Regional Office 2 director Brigadier Gen. Mariano C. Rodriguez.

Ayon sa opisyal, sumuko ang suspek sa lokal na pulisya noong Setyembre 9 at umamin na pinatay niya ang babae na natagpuang patay walong araw bago siya sumuko.

Pinaniniwalaang pinatay ang babae matapos silang magtalo ng suspek kaugnay ng ilang transaksiyon sa negosyo.

Sa isinagawang pagtatanong, sinabi ng akusado na nasa impluwensiya siya ng droga nang patayin niya ang babae habang naroon ang kanyang pamangkin.

Idinagdag niya na kaagad matapos nito, dinala niya ang bata sa Barangay Masoc kung saan pinatay rin niya ito upang hindi ito makapagbigay ng testimonya laban sa kanya. Pagkatapos, inilibing niya ang katawan nito sa kalapit na Barangay Ipil Cuneg.

Narekober ng mga lokal na pulis ang katawan ng bata na nasa kalagayang naaagnas na, batay sa impormasyong ibinigay ng suspek. Hiniling ng pulisya na huwag munang ilabas ang mga pangalan ng mga biktima habang nagpapatuloy ang imbestigasyon.

Agad na nagtungo sa lugar ang Nueva Vizcaya Forensic Unit upang suriin at idokumento ang mga labi ng biktima. Layunin nitong makatulong sa mga imbestigador na matukoy ang mga pangyayari at dahilan ng pagkamatay ng bata.

“Ang boluntaryong pagsuko ng suspek at ang pagkakarekober sa mga labi ng bata ay mahahalagang pag-unlad sa kasong ito. Ipagpapatuloy natin ang imbestigasyon batay sa mga katotohanan at ebidensya, habang tinitiyak na ang bawat hakbang ay naaayon sa due process at rule of law,” pahayag ni Gen. Nartatez habang pinuri ang lokal na pulisya sa paglutas sa dalawang karumal-dumal na krimen.

Dagdag pa ng hepe ng PNP: “Walang sinuman ang dapat makaranas ng ganitong uri ng karahasan, higit sa lahat ang isang batang wala namang kakayahang ipagtanggol ang sarili. Sisiguraduhin nating maimbestigahan nang maayos ang kasong ito at mapanagot sa batas ang sinumang mapatutunayang sangkot.”

Ang suspek ay kasalukuyang nakakulong sa Bayombong police jail at nahaharap sa kasong double murder.