IGINIIT ni private prosecutor Atty. Benjamin “Jay” Tolosa Jr. na magkaibang ari-arian ang mga lupang kinukuwestiyon ng House prosecution at ang mga ari-ariang tinutukoy ng kampo ni Vice President Sara Duterte sa kanyang sinumpaang Statement of Assets, Liabilities and Net Worth (SALN).

Ginawa ni Atty. Tolosa ang paglilinaw sa pagdinig ng Senate Impeachment Court kasunod ng mga tanong ni Senate President at Presiding Officer Sen. Francis “Chiz” Escudero tungkol sa pagkakaiba ng mga halagang nakasaad sa SALN ni Duterte at sa mga dokumento ng bentahan ng lupa.

Tinalakay sa pagdinig kung maaaring ipaliwanag ng mga buwis sa paglilipat ng pagmamay-ari at iba pang gastusin sa transaksyon ang mas mataas na halaga ng mga ari-ariang idineklara sa SALN.

“Una sa lahat, Your Honor, ang aming posisyon ay hindi iisa ang mga ari-ariang ito,” pahayag ni Tolosa.

Dagdag pa ni Tolosa, tanging si Vice President Duterte lamang ang makapagbibigay-linaw sa naturang paliwanag at kinakailangan niyang humarap sa hukuman upang personal itong ipaliwanag.

Naging bahagi rin ng palitan ng mga argumento ang petsa ng pagkakabili sa pinagtatalunang ari-arian sa Samal.

Batay sa SALN na iniharap ng depensa, nakasaad na nakuha ang ari-arian noong 2013. Subalit ang Deed of Absolute Sale na sinuri sa pagdinig ay may petsang Marso 15, 2018.

Iminungkahi ni Escudero na maaaring may kaugnayan ang naunang pahayag sa SALN tungkol sa pagbabayad ng hulugan sa pagkakaiba ng mga petsa.

Subalit sinabi ni Tolosa na walang nakasaad sa deed of sale tungkol sa iskedyul ng pagbabayad nang installment.

Binigyang-diin ng prosecutor na wala ring dokumentong nagpapatunay na ang lupang saklaw ng Transfer Certificate of Title (TCT) ay binili sa pamamagitan ng hulugang bayad o nauna nang nagkaroon ng Contract to Sell bago nilagdaan ang Deed of Absolute Sale noong 2018.

Nakasaad sa SALN ang halagang P4,041,000 bilang acquisition cost o halaga ng pagkakakuha sa ari-arian samantalang P3,453,849 lamang ang nakatala sa deed of sale.

Kinuwestiyon din ni Tolosa ang pagsasama ng transfer taxes at iba pang bayarin sa pagkukuwenta ng acquisition cost.

Ayon sa kaniya, may malinaw na mga alituntunin ang Civil Service Commission (CSC) na kailangang sundin sa pagsagot at pagsusumite ng SALN.

Nanindigan naman si Atty. Lindon Miguel Bacquel, abogado ng depensa, na iisa ang mga ari-ariang tinutukoy sa mga dokumentong kanilang iniharap.

Ipinaliwanag din niya na kabilang sa acquisition cost ang mga buwis at iba pang gastusin na may kaugnayan sa transaksyon.

Gayunman, kinuwestiyon ni Escudero kung sapat ang mga naturang karagdagang gastos upang lubusang maipaliwanag ang pagkakaiba ng mga halagang nakasaad sa mga dokumento.

Patuloy na pinag-aaralan ng Senate Impeachment Court ang mga dokumento at testimonya na iniharap ng magkabilang panig kaugnay ng mga alegasyon sa SALN at umano’y hindi maipaliwanag na yaman ni Vice President Duterte.