BANK at tax records ni Vice President Sara Duterte ang susunod na sisilipin ng impeachment court matapos ipadala ang mga subpoena sa Anti-Money Laundering Council, Bureau of Internal Revenue at pitong bangko.

Sinabi ni impeachment court spokesperson Atty. Reggie Tongol na inilabas ng Senate Sergeant-at-Arms ang mga subpoena dakong 8:44 ng umaga nitong Miyerkules.

Kinumpirma niyang natanggap ng BIR ang subpoena dakong 2:24 ng hapon. Kailangan pa aniyang tingnan ang returns ng process servers upang malaman ang eksaktong oras at status ng pagtanggap ng iba pang pinadalhan.

Kabilang sa mga pinadalhan ng subpoena ang AMLC, Bank of the Philippine Islands, BDO Unibank, Philippine Savings Bank, Metropolitan Bank & Trust Company, Security Bank Corporation, Land Bank of the Philippines at BIR.

“Na-serve na po yung sabina kanina, 8.44 a.m. po inilabas ng Sergeant at Arms dito po yung sabina at natanggap naman ng BIR ng 2.24 p.m.,” sinabi ni Tongol.

“As to the others, I need to check the dates and time ng return ng ating process server para malaman ko yung specific ng mga oras,” dagdag niya.

Nilinaw din ni Tongol na hindi mapipigil ng mga manifestation ng limang senator-judge ang pagpapatupad ng resolution na nag-apruba sa mga subpoena.

“Yung mga manifestation po yun ay for the records only. Hindi na po yun makakapekto doon sa current standing ng resolution as implementable by the impeachment court,” aniya.

Ayon kay Tongol, mananatili sa record ang mga manifestation bilang posibleng sanggunian ng mga susunod na impeachment court.

Nakalagay rito ang magkakaibang legal na pananaw ng mga senator-judge sa aplikasyon ng mga batas sa kaso.

Inaasahang lilipat ang susunod na yugto ng paglilitis sa Article 2, na tumatalakay sa alegasyon ng unexplained wealth.

“Yung sa Article 2 po, it is about unexplained wealth,” sabi ni Tongol.

Ipinatawag din ng impeachment court sina Violeta Camposano at Denita Constantino, mga kinatawan ng LandBank, upang tukuyin ang mga tsekeng sakop ng mga subpoena.

Sinabi ni Tongol na maaaring hilingin sa mga saksi na patunayan ang pag-iral ng mga tseke at tumestigo tungkol sa galaw ng pera, batay sa pangkalahatang layuning nakasaad sa pre-trial brief.

“Yung mga LandBank representatives po, I think mga cheque yung dadalhin po nila at na-comply na rin po nila yun na ibigay na nila sa clerk of court yung mga cheques na pinasampina,” aniya.

“I think they will just identify based sa purpose na nilagay sa PTRL brief, nai-identify nila yung mga cheques na yun as existing at saka yung flow po ng money,” dagdag niya.

Nilinaw ni Tongol na malalaman lamang ang eksaktong layunin ng testimonya kapag pormal nang iniharap ng prosekusyon ang offer of testimony para sa mga saksi.

Wala pang bank o tax record na iniharap o sinuri sa bukas na pagdinig.

Wala ring ruling ang impeachment court na nagpapatunay sa alegasyon ng unexplained wealth.

Inaatasan lamang ng mga subpoena ang mga institusyon at saksi na magsumite ng tinukoy na records o humarap sa korte.

Inaasahang magpapatuloy ang paglilitis sa susunod na linggo, ngunit kailangan pang kumpirmahin ang eksaktong petsa ng pagharap ng mga kinatawan ng LandBank dahil magkaiba ang mga petsang nabanggit sa briefing.