NASAKOTE ng pulisya ang dalawang kelot nang matiyempuhang nasa kalagitnaan ng kanilang umano’y transaksiyon ng ilegal na droga Sabado ng madaling araw sa Taguig City.

Hindi na nagawang tumakas nina alyas “Sonny Boy” 28, at alyas “Pretty Boy”, 43, kapuwa mga nakalista bilang mga high value individual (HVI) nang dakmain sila ng mga tauhan ng Taguig Police Sub-Station-4 dakong alas-4:40 ng madaling araw sa Brgy. Sta Ana.

Ayon kay Southern Police District (SPD) Director P/BGen. Bernard Yang, kabilang ang mga tauhan ng Taguig Police Sub-Station 4 sa puwersa ng kapulisan na nakatalagang magpatrulya 24/7 sa panahon ng Undas sa naturang lungsod.

Sinabi ni Yang na bukod sa isang knot-tied plastic sachet na naglalaman ng 45 gramo ng shabu na nagkakahalaga ng P306,000 at dalawang heat-sealed plastic sachet na may 10 gramo ng shabu na may katumbas ng halagang P68,000.00, nakumpiska rin sa mga suspek ang isang kalibre .40 Taurus pistol na may bala sa magazine at dalawa pang extra magazine na may karga namang kabuuang 11 bala ng kalibre .40.

Ang mga nakumpiskang shabu ay kaagad dinala ng mga pulis sa SPD Forensic Unit upang isailalim sa laboratory analysis habang ang kalibre .40 pistola ay isasailalim sa ballistic examination upang alamin kung kabilang ito sa nagamit sa iba pang mga krimen.

Sasampahan ng mga kasong paglabag sa Comprehensive Dangerous Drugs Act of 2002 (RA 9165) ay Comprehensive Law on Firearms and Ammunition (RA 10591) ang dalawang suspek sa Taguig City Prosecutor’s Office.