NASA likod na ng malamig na rehas ang isang bebot na nag-trip takutin ang mga taong dumadaan ng dala niyang baril sa Malabon City.

Tinimbog ng mga tauhan ni Malabon police chief P/Col. Jay Baybayan si alyas Gina na hawak pa ang kalibre .38 revolver na kanyang itinututok para takutin ang mga taong dumadaan sa harap niya.

Ayon sa report, dakong alas-5:35 ng umaga noong Lunes nang magsumbong Police Sub-Station-5 ang mga tinakot ni Gina habang naglalakad sa Block 8, Langaray St., Brgy. Longos.

Inobserbahan ng palihim ng mga pulis ang kilos ng suspek at napatunayan nila na nananakot nga ng mga dumadaan gamit ang baril niya.

Bago pa makatakas si Gina, napalibutan na siya ng mga pulis at kinumpiska ang hawak niyang baril na may dalawang bala.

Nahaharap ang bebot sa kasong paglabag sa RA 10591 o ang Comprehensive Firearms and Ammunition Act matapos mabigong makapagpakita ng kaukulang dokumento sa dala niyang baril.