ISASAGAWA ng bicameral conference committee (bicam) ang pagtalakay sa panukalang ₱6.793-trilyong pambansang badyet para sa 2026 sa pamamagitan ng probisyon-by-probisyon na paghahambing ng bersyon ng Senado at Kamara, ayon kay Senate Deputy Majority Leader Risa Hontiveros.

Ayon kay Hontiveros, ang bicam deliberations ay isang detalyadong line-by-line at side-by-side na pagsusuri ng General Appropriations Bill na hiwalay na inaprubahan ng Senado at ng House of Representatives. Lahat ng hindi pagkakatugma—maging sa halaga ng pondo, paglalarawan ng mga proyekto, o mga espesyal na probisyon—ay inilalagay sa isang reconciliation matrix na nagsisilbing pangunahing dokumento sa negosasyon.

“Dito talaga makikita kung paano pinagkakasundo ang dalawang bersyon,” paliwanag ni Hontiveros, sabay banggit na sinusuri ng mga conferee kung paano kinuwenta ang mga halaga, kung may malinaw na batayan ang mga dagdag o bawas, at kung nananatili ang mga alokasyon sa loob ng kabuuang spending ceiling na inaprubahan ng Kongreso. Binigyang-diin niya na hindi ito simpleng pagpili sa mas mataas o mas mababang halaga, kundi beripikasyon ng katumpakan, legalidad, at layunin.

Partikular ding binibigyang-busisi ang mga espesyal na probisyon dahil maaari umanong makaapekto ang mga ito sa paraan ng paggastos, pagre-realign, o implementasyon ng badyet ng mga ahensya. “Minsan hindi lang amount ang pinag-uusapan—pati kung paano gagamitin ang pondo,” ayon kay Hontiveros, at idinagdag na maaaring kuwestiyunin o alisin ang malabo o masyadong maluluwag na probisyon upang maiwasan ang posibleng pang-aabuso.

Tungkulin ng bicameral conference committee na resolbahin ang lahat ng pagkakaiba sa bersyon ng Senado at Kamara, kabilang ang antas ng pondo ng mga ahensya, mga proyektong pinondohan sa lokal, at mga kondisyunal o special-purpose allocations. Kapag nagkaisa ang dalawang panig, bubuo ang panel ng isang bicam report na kinakailangang iratipika ng parehong kapulungan bago ito ipadala sa Malacañang para sa pag-apruba o posibleng pag-veto ng Pangulo.

Naging sentro ng pansin ngayong taon ang bicam matapos magkasundo ang mga lider ng Kongreso na i-livestream ang mga pagdinig, isang paglihis sa nakasanayang closed-door na pag-uusap.

Ayon sa mga mambabatas na sumuporta sa hakbang, layon nitong ipakita sa publiko kung paano binubuo ang pinal na desisyon sa badyet, lalo na sa gitna ng matagal nang alalahanin hinggil sa mga diumano’y last-minute insertions at hindi malinaw na reallocation.

Ang panukalang 2026 national budget—na katumbas ng humigit-kumulang 22 porsiyento ng gross domestic product—ay nagbibigay-prayoridad sa edukasyon, kalusugan, imprastraktura, social protection, at pagbabayad ng utang. Gayunman, kinikilala ng mga mambabatas na maaari pang magbago ang pinal na mga halaga habang inaayos sa bicam ang mga pinagtatalunang item at itinatapat sa mga target na piskal.

Samantala, kinumpirma ng mga source sa Senado na umatras si Sen. Jinggoy Ejercito Estrada bilang miyembro ng bicameral conference committee na magtatakda ng pinal na anyo ng 2026 spending measure. Wala pang inilalabas na opisyal na paliwanag sa kanyang pag-urong, at hanggang sa oras ng pagsulat ay wala pang inaanunsiyong kapalit na conferee ang Senado.

Nakatakda ang mga pulong ng bicameral conference committee mula Disyembre 12 hanggang 14 sa Philippine International Convention Center (PICC). Hindi pa inilalabas ng Kongreso ang pinal na iskedyul ng livestream, subalit sinabi ng mga opisyal ng Senado at Kamara na maglalabas ng mga anunsiyo sa kanilang opisyal na mga plataporma kapag nagsimula ang deliberasyon.