NATIMBOG ng mga operatiba ng Quezon City Police District (QCPD) ang suspek sa pagbaril at pagpatay sa security guard sa Quezon City noong Lunes.

Dinakip ang 44-anyos na suspek ng mga operatiba ng Criminal Investigation and Detection Unit ng QCPD sa kanyang hideout sa Brgy. Culiat dakong alas-11:25 ng gabi.

Siya ay kinilala ng saksi na bumaril at nakapatay sa biktimang si alyas Malang sa Brgy. Talipapa.

Nakunan sa CCTV na naka-duty si Malang sa automotive shop noong Linggo nang pagbabarilin ng maraming beses ng suspek bandang alas-5:25 ng hapon at saka tumakas sakay ng motorsiklo.

Nakuha mula sa suspek ang kalibre .38 na baril nang maaresto.

Inihahanda na ang mga kasong pagpatay at illegal possession of firearm na isasampa laban sa suspek.