ISANG caretaker noong Lunes ang walang awang pinagbabaril at napatay ng mga nakatakas na salarin sa Sitio Malalim, Brgy. Maybancal, Morong, Rizal.

Kinilala ng mga pulis-Morong ang biktima na si Romelito Del Castillo Asur na binaril at napatay dakong alas-4:20 ng hapon.

Tumakas ang mga suspek na sina alyas Roger at alyas John matapos ang pamamaril.

Batay sa imbestigasyon, dakong alas-4:20 ng hapon habang ang biktima nakatayo malapit sa kanyang bahay ng biglang dumating ang mga suspek sakay ng pulang scooter.

Bumunot ng baril ang isa sa dalawang suspek at sa hindi malamang dahilan pinaputukan ng ilang beses ang biktima na nagresulta sa kanyang agarang pagkamatay.

Pagkatapos nito, tumakas ang mga suspek patungo sa Brgy. Maybancal.

Hindi nahuli ang mga hitman sa kabila ng road block at cobweb/checkpoint malapit sa lugar ng krimen.