IGINIIT noong Sabado ni House prosecutor at Manila 3rd District Rep. Joel Chua na walang kapangyarihang konstitusyonal ang Senado upang ibasura ang impeachment case laban kay Vice President Sara Z. Duterte, at sinabi na ang tanging tungkulin nito ay ituloy ang paglilitis sa sandaling matanggap nito ang Articles of Impeachment.

Sa ginanap na Saturday News Forum sa Dapo Restaurant sa Quezon City, sinabi ni Chua na pinili ng House prosecution panel na magsumite ng Manifestation sa halip na Reply sa Answer ni Duterte dahil marami sa mga argumento ng kampo ng Bise Presidente ay tila naglalayong maibasura ang kaso.

“Doon sa kanyang answer kasi parang pinapa-motion to dismiss niya. This is like parang motion to dismiss. At naniniwala kami na wala namang karapatan o awtoridad ang Senado para ito ay desisyunan,” ani Chua.

Binigyang-diin ng chairman ng House Committee on Good Government and Public Accountability na malinaw na itinatakda ng Konstitusyon ang papel ng Senado sa mga paglilitis ng impeachment.

“Ang tanging trabaho ng Senado ay i-try at ‘yun po ay maliwanag sa ating Saligang Batas. The Senate shall try upon receiving the Articles of Impeachment. The Senate shall proceed to the trial forthwith,” aniya.

Ayon kay Chua, ang tanging paraan upang matapos ang impeachment proceedings ay kapag nakapaglabas na ng pinal na pasya ang Senado.

“The only reason or the only way para ito ay ma-dismiss ay kung nag-render na ng desisyon ang Senado at it’s either ma-acquit o ma-convict ang ating Bise Presidente,” paliwanag niya.

Tinanggihan din ni Chua ang pagkuwestiyon ng Bise Presidente sa hurisdiksyon ng House of Representatives at ng Committee on Justice.

“Maliwanag po sa ating Saligang Batas na ang House ay may exclusive jurisdiction, may exclusive power to initiate impeachment proceedings,” aniya.

Nagbabala siya na kung magpapasya ang Senado sa mga usaping may kinalaman sa hurisdiksyon ng Kamara, para na rin itong kumikilos bilang isang appellate court.

“Kung ito ay tutugunan ng Senado o didesisyunan base dito sa argumento ng ating Bise Presidente, parang ang nangyayari ay nagde-desisyon sila bilang isang appellate court,” sabi ni Chua.

Idinagdag pa ng lider ng Kamara mula sa Maynila na ilan sa mga usaping konstitusyonal at hurisdiksyon na ibinangon ng kampo ni Duterte ay nakabinbin na sa Korte Suprema sa pamamagitan ng mga petisyon para sa certiorari at prohibition.

“Kung ito po ay tutugunan ng Senado, parang pinangungunahan pa nila ang Korte Suprema,” ani Chua.

Nakatakdang isagawa ng Senate impeachment court ang pre-trial conference nito sa Hunyo 18, habang ang pormal na paglilitis ay nakatakdang magsimula sa Hulyo 6.