CAMP SGT QUINTIN M MERECIDO, Buhangin, Davao City – Naaresto ang No. 4 na “high-value target” (HVT) drug suspect sa Region 11 sa buy-bust nitong Martes sa Davao City.

Sinabi ni PRO11 (Police Regional Office 11) Director Brig. Gen. Benjamin Silo Jr. na mga miyembro ng RSOG-RPDEU XI kasama ang PS13, DCPO, TSC, at 1105th, RMFB 11 ay inaresto si Ibrahim Payag Adil sa isang entrapment op sa Marquella complex, Bgy. Tigatto, Davao City.

Narekober mula sa suspek ang walong plastic sachet ng shabu na may tinatayang bigat na hindi bababa sa 40 gramo na nagkakahalaga ng P640,000, at ang P38,000 na buy-bust money.

Pinuri ni Silo ang kanyang mga tauhan para sa matagumpay na operasyon ng droga.

“Hinahamon ko ang lahat ng unit commander na linisin ang kani-kanilang mga lugar na apektado ng ilegal na droga bago matapos ang termino ni Pangulong Rodrigo Roa Duterte,” ani Silo. Kasama si Joanne Rosario, OJT.