Matapos ang House review

BINAGO ni Davao City Rep. Paolo “Pulong” Duterte ang kanyang request para sa foreign travel at nilimitahan ang mga petsa at destinasyon, matapos ma-flag ng House of Representatives dahil sa scheduling concerns kaugnay ng opisyal na mga araw ng sesyon.

Sa isang statement, sinabi ni Atty. Jose Marmoi F. Salonga, executive director ng Office of the Secretary General, na natanggap ng Kamara ang initial request noong Disyembre 1, 2025, para sa paglalakbay mula Disyembre 15, 2025, hanggang Pebrero 20, 2026, na sumasaklaw sa 17 destinasyon sa ibang bansa.

“The House of Representatives confirms receipt of the request for travel clearance from Representative Duterte,” ani Salonga.

Sinabi niya na sumulat ang chamber sa mambabatas upang humingi ng karagdagang detalye at isang revised submission “to facilitate proper evaluation, given the overlap with official session days.”

Ayon kay Salonga, sumunod si Duterte at nagsumite ng revised request na may petsang Disyembre 15, na nilimitahan ang planong paglalakbay mula Enero 3 hanggang Enero 30, 2026, at sa dalawang destinasyon lamang ― Netherlands at Australia.

“The stated purpose includes visiting former President Rodrigo Roa Duterte, currently detained in The Hague, and visiting the Representative’s daughter studying in Australia,” sinabi ni Salonga.

Ipinahayag din ng mambabatas na lahat ng gastusin sa paglalakbay ay sasagutin nito mula sa personal na pondo, ayon sa statement.

Sinabi ni Salonga na kasalukuyang sinusuri ng House ang revised request.

“The revised request is currently under evaluation in accordance with House rules and administrative procedures, considering institutional requirements and official session schedules,” aniya.

Binigyang-diin ng mga opisyal ng House na ang mga kahilingan para sa paglalakbay sa ibang bansa ng mga miyembro ay karaniwang sinusuri, upang matiyak ang pagsunod sa tungkulin sa lehislatura at sa mga itinatag na administratibong tuntunin.