HINDI umano naniniwala si 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗯𝗶𝗹𝗮𝗻𝗴 𝗖𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗠𝗲𝘁𝗿𝗼 𝗠𝗮𝗻𝗶𝗹𝗮 𝗗𝗲𝘃𝗲𝗹𝗼𝗽𝗺𝗲𝗻𝘁 𝗻𝗮 𝗮𝗻𝗴 𝗺𝗴𝗮 𝗶𝘀𝗶𝗻𝗮𝘀𝗮𝗴𝗮𝘄𝗮𝗻𝗴 “𝗿𝗲𝗰𝗹𝗮𝗺𝗮𝘁𝗶𝗼𝗻 𝗽𝗿𝗼𝗷𝗲𝗰𝘁𝘀” 𝗻𝗴 𝗽𝗮𝗺𝗮𝗵𝗮𝗹𝗮𝗮𝗻 𝗮𝗻𝗴 𝗻𝗮𝗴𝗶𝗻𝗴 𝘀𝗮𝗻𝗵𝗶 𝗻𝗴 𝗺𝗮𝘁𝗶𝗻𝗱𝗶𝗻𝗴 𝗽𝗮𝗴𝗯𝗮𝗵𝗮 𝘀𝗮 𝗶𝗹𝗮𝗻𝗴 𝗯𝗮𝗵𝗮𝗴𝗶 𝗻𝗴 𝗠𝗲𝘁𝗿𝗼 𝗠𝗮𝗻𝗶𝗹𝗮 𝘀𝗮 𝗸𝗮𝘀𝗮𝗴𝘀𝗮𝗴𝗮𝗻 𝗻𝗴 𝗺𝗮𝗹𝗮𝗸𝗮𝘀 𝗻𝗮 𝗯𝗮𝗴𝘆𝗼𝗻𝗴 𝗖𝗮𝗿𝗶𝗻𝗮.

Ipinaliwanag ni Valeriano na bago pa man nagkaroon ng reclamation projects ang gobyerno partikular na sa Manila Bay ay mayroon na talagang matinding pagbaha hindi lamang sa Maynila kundi sa iba pang lugar sa National Capitol Region (NCR) lalo na sa mga lugar na malapit sa ilog o estero.

Ayon kay Valeriano, hindi pa naman talaga napapatunayan at walang pang isinagawang pag-aaral na magsasabing ang mga reclamation projects ang pinag-uugatan o kaya’y pinagmumulan ng mga pagbaha sa iba’t-ibang lugar sa Kalakhang Maynila.

“Kasi wala pa namang reclamation projects ang gobyerno lalo na sa Manila Bay, mayroon ng mga pagbaha sa Metro Manila. Kaya hindi natin masasabi na ito ang ugat ng mga pagbaha,” paliwanag ni Valeriano.

Ipinabatid ni Valeriano na ang reklamo ng ilang mamamayan patungkol sa talamak na “quarrying” ang isa sa mga issues na bubusiin ng kaniyang Komite sa pagsisimula ng imbestigasyon nito kaugnay sa naging pagbaha sa ilang lugar sa Metro Manila noong kasagsagan ng bagyong Carina.

“Ang issue ng quarrying ang isa sa mga iimbestigahan namin sa aming imbestigasyon. Hindi lang iyan kundi ang lahat na ng issues para ugatin natin kung ano ang naging problema noong sinasalanta tayo ng bagyong Carina,” sabi pa ni Valeriano.