INIHAIN ni Senator Risa Hontiveros ang Senate Resolution No. 194 na nag-uutos sa Senate Committee on Health and Demography na magsagawa ng imbestigasyon, in aid of legislation, kaugnay ng mga panganib sa kalusugan mula sa mga unregulated at unregistered supplements at iba pang health products na ibinebenta online.

Sa kanyang manifestation, sinabi ni Hontiveros na nananatiling seryosong banta sa kalusugan ng publiko ang madaling pagbili ng mga produktong ito sa internet, sa kabila ng mga babala mula sa mga ahensya ng gobyerno. Binanggit niya ang mga advisory ng Food and Drug Administration at ng Department of Health, pati ang mga ulat na pabata nang pabata ang mga pasyenteng sumasailalim sa dialysis na iniuugnay sa paggamit ng unregulated supplements na nabili online.

Ayon sa mga health regulator, iniulat na paulit-ulit ang mga babala laban sa pagbili ng mga hindi rehistradong food supplements, dahil ang mga produktong ito ay hindi dumaan sa proseso ng pagsusuri ng FDA kaya hindi matitiyak ang kalidad at kaligtasan ng mga ito. May mga naunang advisory na iniulat ding tumukoy sa ilang produktong ibinebenta online na walang wastong Certificate of Product Registration at maaaring magdulot ng panganib sa kalusugan.

Sa ilalim ng Republic Act No. 9711 o Food and Drug Administration Act of 2009, may kapangyarihan ang FDA na i-regulate ang mga health product at ipinagbabawal ang paggawa, pag-aangkat, pagbebenta, o pamamahagi ng mga hindi rehistradong produkto kabilang ang dietary supplements. Gayunman, iniulat na patuloy pa ring may mga ganitong produkto na lumalabas sa online at pisikal na pamilihan, kaya’t paulit-ulit ding nagpapaalala ang FDA sa publiko na beripikahin muna ang rehistrasyon bago bumili.

Iginiit ni Hontiveros na hindi na sapat ang pagbibigay ng babala lamang at kinakailangan ang mas mahigpit na enforcement at pagpapalakas ng kakayahan ng mga health at regulatory authorities.

Sinabi niya na magsasagawa ang Senate Committee on Health and Demography ng imbestigasyon upang makabuo ng mga panukalang batas na magpapalakas sa proteksyon sa kalusugan at karapatan ng mga mamimili.

Pinagtibay na ng Senado ang nasabing resolusyon.