SINABI nitong Sabado ni House prosecution panel trial spokesperson at Kinatawan ng Lanao del Sur na si Zia Alonto Adiong na ang Senate impeachment court ang siyang magpapasya kung ang dating court sheriff na sinuntok ni Bise Presidente Sara Z. Duterte ay maaaring hindi na tumestigo sa kanyang impeachment trial matapos hilingin na huwag nang isama sa mga paglilitis.

Ginawa ni Alonto Adiong ang pahayag matapos umapela si dating Davao City court sheriff Abe Andres, isa sa mga nakalistang testigo ng prosekusyon, na huwag na siyang isama sa tinawag niyang “partisan political matters.”

Sa Saturday News Forum sa Dapo Restaurant sa Quezon City, sinabi ni Alonto Adiong na nauunawaan ng prosekusyon ang pag-aalangan ni Andres na muling balikan ang kanyang naging karanasan kay Duterte.

“Nauunawaan namin ang pangamba ni G. Abe. Natural po ang emosyon niya dahil ang naranasan niya kay Bise Presidente ay hindi madaling balikan para sa isang tao,” ani Alonto Adiong.

“At sa pinakababang antas, ito ay isang nakakahiyang pangyayari sa personal na lebel—ang makatanggap ng ganoong pagtrato mula sa Bise Presidente, na ang tanging ‘kasalanan’ lamang ay ang pagsunod niya sa utos ng korte,” dagdag pa niya.

Si Andres ay dating court sheriff na sinuntok umano ni Duterte noong 2011 sa isang demolition operation na may kaugnayan sa mga informal settler habang ipinatutupad ang utos ng korte.

Siya ngayon ay Human Resource Management Officer sa Korte Suprema (SC).

Isinama ng House prosecution panel si Andres bilang posibleng testigo para sa Article IV ng impeachment complaint. Ayon kay House prosecutor at Manila Rep. Joel Chua, hindi layunin ng prosekusyon na muling litisin ang insidente noong 2011, kundi upang makatulong sa pagpapatunay ng umano’y marahas na asal ni Duterte.

Sinabi ni Alonto Adiong na sumusunod lamang ang prosekusyon sa utos ng impeachment court sa pamamagitan ng pagsusumite ng listahan ng mga posibleng testigo at ebidensya.

“Bilang pagsunod sa proseso, nagsumite kami ng listahan ng mga posibleng ebidensya. Mga potensyal na ebidensya pa lamang ito. Sa huli, ang korte ang mag-iisyu ng imbitasyon o subpoena,” aniya.

Binigyang-diin niya na ang Senate impeachment court, at hindi ang prosekusyon, ang magpapasya kung sino ang kailangang tumestigo.

“Ang pagkakaalam po natin, kapag naglabas na ang korte ng subpoena o imbitasyon, ang desisyon kung sasama o hindi ay hindi na magiging mahalaga, lalo na kung ito ay utos na ng korte,” ani Alonto Adiong.

Itinanggi rin niya ang pahayag na ang impeachment proceedings ay bahagi ng partisan politics, at iginiit na tungkulin ito ng Senado bilang bahagi ng Konstitusyon.

“Ang korte ay isang non-partisan na lugar upang talakayin ang accountability mechanism ng Konstitusyon. Ang Konstitusyon ay hindi nakabatay sa partidong pulitika o personal na kagustuhan,” aniya.

“Kaya nga po, ang korte ang may kapangyarihang maglabas ng imbitasyon at subpoena. At kapag naglabas na ang korte ng subpoena, ang personal na pagpili kung dadalo o hindi ay hindi na mahalaga dahil ito ay pagsasakatuparan ng kanilang tungkuling konstitusyonal na dinggin at pagpasiyahan ang kaso,” dagdag pa niya.

Nakatakdang simulan ng Senate impeachment court ang paglilitis sa Hulyo 6 matapos makumpleto ang pre-trial proceedings noong Hunyo 25.