Ipinagpaliban ng House of Representatives ang trabaho at nakatakdang plenary session sa Lunes, Nobyembre 10, bilang pag-iingat sa inaasahang epekto ng Super Bagyong Uwan, na magdadala ng malalakas na ulan at hangin sa iba’t ibang rehiyon.

Sa isang abisong inilabas noong Sabado, inihayag ni House Secretary General Atty. Cheloy E. Velicaria-Garafil ang suspensyon, dahil sa pangamba para sa kaligtasan ng mga empleyado at bisita ng Kamara.

“Dahil sa inaasahang masamang panahon dulot ng Bagyong Uwan, ang trabaho sa House of Representatives, kabilang ang plenary session, ay pansamantalang sinuspinde sa Lunes, Nobyembre 10, 2025,” ayon sa abiso ni Garafil.

Binigyang-diin din niya na ang mga tanggapan na may mahahalagang tungkulin ay inaasahang magpapatuloy ng operasyon upang matiyak ang tuloy-tuloy na pagbibigay ng mga serbisyong kritikal.

“Nanatiling matatag ang pamunuan ng Kamara sa pangako nitong pangalagaan ang kalusugan, kaligtasan, at kapakanan ng lahat ng empleyado,” dagdag pa ni Garafil.

Hinimok din niya ang mga kawani na mag-ingat, manatiling ligtas, at maghanda ng mga pangunahing pangangailangan habang papalapit ang bagyo.

“Ang lahat ng kawani ay pinapayuhang mag-ingat, manatiling ligtas, at maghanda ng mga kinakailangang suplay sa panahong ito,” nakasaad sa abiso.

Ang suspensyon ay kasabay ng pagtataas ng alerto ng mga awtoridad sa ilang bahagi ng bansa kasunod ng babala mula sa Philippine Atmospheric, Geophysical and Astronomical Services Administration (PAGASA) na maaaring lumakas pa si Uwan at maging isang super typhoon.