PINARANGALAN ng Kamara si Alex Eala sa makasaysayang tagumpay sa Wimbledon habang muli siyang nagtala ng panibagong malaking panalo.

Pinagtibay ng Kamara de Representantes ang isang resolusyon na nagbibigay-pugay kay Alexandra “Alex” Eala dahil sa kanyang makasaysayang tagumpay sa Wimbledon, kasabay ng pagpapatuloy ng kahanga-hanga niyang kampanya ngayong taon sa pamamagitan ng panibagong malaking panalo sa pandaigdigang entablado ng tennis.

Sa ilalim ng House Resolution No. 1190, pinapurihan si Eala bilang kauna-unahang Pilipinong nakapasok sa Round of 16 ng isang Grand Slam singles tournament sa Wimbledon Championships ngayong taon.

Kasabay ng pagkilala ng Kamara, tinalo ni Eala ang defending Washington Open champion na si Leylah Fernandez upang umabante sa quarterfinals, na lalo pang nagpatibay sa itinuturing na pinakamahusay na season ng isang Pilipinong manlalaro ng tennis.

Ang resolusyon, na inihain nina Speaker Faustino “Bojie” G. Dy III, Majority Leader Ferdinand Alexander “Sandro” A. Marcos, at Minority Leader Marcelino C. Libanan, ay kumilala sa makasaysayang kampanya ni Eala sa Wimbledon. Tampok dito ang kanyang mga panalo laban kina Renata Zarazúa, Maya Joint, at defending champion na si Iga Świątek bago siya yumuko sa isang mahigpit na laban sa fourth round kontra kay Jasmine Paolini.

Kinilala rin ng Kamara ang napakahusay na kampanya ni Eala sa grass-court season, kabilang ang kanyang pagkapanalo sa Women’s Tennis Association (WTA) 125 tournament sa Birmingham at ang kanyang pag-abot sa semifinals ng Berlin Tennis Open. Ayon sa resolusyon, ang mga tagumpay na ito ay nagtaas sa antas ng Philippine tennis sa pandaigdigang entablado.

Isinalaysay rin sa resolusyon ang pag-angat ni Eala mula sa pagiging apat na taong gulang na nangangarap maging tennis player hanggang sa pagiging isa sa pinakamaningning na batang bituin ng isport.

Binalikan din ang kanyang mga unang tagumpay, kabilang ang pagkapanalo ng Li Na Inspiration Award sa edad na 11 at ang prestihiyosong Les Petits As tournament sa France sa edad na 12, bago siya nabigyan ng scholarship sa Rafa Nadal Academy sa Mallorca, Spain, kung saan siya nagsanay at nagtapos noong 2023.

Kinilala rin ng resolusyon ang tuluy-tuloy na pag-angat ni Eala sa pandaigdigang ranggo ng tennis, kabilang ang kanyang mga titulo sa 2021 French Open girls’ doubles, 2022 US Open girls’ singles, 2025 Lexus Eastbourne Open, at 2025 Guadalajara 125 Open. Ang mga tagumpay na ito ang nagsilbing pundasyon ng kanyang makasaysayang pag-abot sa Wimbledon Round of 16 ngayong taon.

Binigyang-diin ng Kamara na sa murang edad na 21, nagbigay na si Eala ng malaking karangalan sa bansa at patuloy na nagbibigay-inspirasyon sa kabataang Pilipino na magsikap at magtagumpay sa pamamagitan ng dedikasyon at determinasyon.

Inulit din sa resolusyon ang naunang pahayag ni Pangulong Ferdinand R. Marcos Jr. na si Eala ay “nagsisimula pa lamang,” kasabay ng personal niyang kasabihang, “Kapag lumago, hindi na hihinto.”

Nang makapasok si Eala sa Wimbledon Round of 16 noong unang bahagi ng buwang ito, pinuri siya ni Speaker Dy dahil sa pagbibigay-inspirasyon sa sambayanang Pilipino.

“Congratulations, Alex! Muli mo na namang ipinagmalaki ang ating mga kababayan. Sa bawat panalo mo, ipinapakita mo sa buong mundo ang husay, tapang, at determinasyon ng Pilipino,” ani Speaker Dy.

“Hindi ka lamang nananalo sa mga laban—napapanalo mo rin ang puso ng maraming tao sa buong mundo at nagbibigay-inspirasyon sa napakaraming kabataang Pilipino na mangarap nang malaki at maniwala sa kanilang kakayahan,” dagdag pa niya.

Tiniyak din ng kinatawan ng Isabela kay Eala ang patuloy at buong suporta ng sambayanang Pilipino habang ipinagpapatuloy niya ang kanyang makasaysayang kampanya.

Sa ilalim ng resolusyon, isang sipi nito ang ipapadala kay Eala bilang pagkilala sa kanyang makasaysayang mga tagumpay at sa patuloy niyang kontribusyon sa larangan ng sports sa Pilipinas.