ISANG lalaki ang binaril at napatay ng di-kilalang salarin habang naghihintay ng kanyang motorsiklo na hinuhugasan sa isang carwash sa Mla. East Rd. Brgy. San Juan, Taytay, Rizal, nitong Lunes.

Ayon sa pulis Taytay, ang biktima ay nakilalang si Jerry Carreon, 28, nakatira sa 68 Rizal Avenue, Brgy. San Juan, Taytay.

Ang hindi pa nakikilalang suspek ay sakay ng pula at itim na Honda Click MC, nakasuot ng Angkas helmet, itim at puting long sleeved shirt, itim na pantalong maong at pulang sapatos, may maayos na pangangatawan at may taas na 5’7”.

Nabatid sa imbestigasyon na bandang alas-9:45 ng umaga ng December 16 ay nakitang nakaupo ang biktima sa loob ng Dad’s Garage Carwash nang biglang dumating ang suspek sakay ng motorsiklo, nagpanggap na customer at ipinarada ang kanyang sasakyan sa likod ng biktima.

Armado ng kalibre 9mm ay nilapitan ng suspek ang biktima mula sa likuran.

Pinaputukan ng suspek ang biktima sa ulo na agad namatay. Tumakas ang suspek sakay ng motorsiklo patungo sa Mla. East Rd. Taytay Town Proper. Hiniling ang isang team ng Rizal Provincial Forensic Unit para sa technical investigation sa pinangyarihan ng krimen

Kasalukuyang nirerebisa ang mga kuha ng CCTV sa lugar ng insidente at kalapit na establisyimento. Tinatanong rin ang mga taong nakasaksi sa naganap na krimen kasama ang follow-up na imbestigasyon para sa pagkakakilanlan at posibleng pag-aresto sa suspek.