MAAARING tawagin bilang mga hostile witness ang ilang opisyal mula sa Office of the Vice President (OVP) at Department of Education (DepEd) sa impeachment trial ni Vice President Sara Z. Duterte, ayon kay lead prosecutor Atty. Gerville “Jinky Bitrics” Luistro ng Batangas.

Ginawa ni Luistro ang pahayag matapos magsumite ang House prosecution panel ng kanilang pre-trial brief na naglalaman ng listahan ng mga saksi at ebidensyang ihaharap sa pre-trial conference sa Hunyo 18 sa harap ng Senado bilang impeachment court.

“Ang hostile, maaari ninyong asahan na ang mga ito ay mga opisyal mula sa OVP o DepEd,” pahayag ni Luistro.

“Sa tingin ko, karamihan sa kanila ay nakita na ninyo sa mga pagdinig ng Committee on Good Government and Public Accountability para sa mga panukalang batas, na noon ay pinamunuan ni Chair Joel Chua sa ika-19 na Kongreso,” dagdag niya.

Mahalagang bahagi ng mga paratang sa impeachment ang OVP at DepEd kaugnay ng paggamit ng confidential funds, dahil nagsilbi si Duterte bilang bise presidente at kalihim ng edukasyon sa panahong saklaw ng ilang imbestigasyon ng Kongreso.

Sinabi rin ni Luistro na inaasahan ng prosekusyon ang matinding pagtutol mula sa kampo ni Duterte kapag iniharap na ang mga ebidensyang may kaugnayan sa alegasyon ng hindi maipaliwanag na yaman o unexplained wealth.

“Nang hindi muna binabanggit nang partikular ang mga saksi at ebidensyang ihaharap, inaasahan namin na mangyayari iyan sa artikulo tungkol sa unexplained wealth,” ani Luistro.

“Kasi naramdaman na namin iyan noong pagdinig ng Justice Committee,” dagdag niya.

Nang tanungin kung tututulan ng depensa ang pagsisikap na maipatawag ang mga rekord ng bangko at mga opisyal ng bangko, sinabi ni Luistro na inaasahan na ng prosekusyon ang ganoong hakbang.

“Inaasahan na namin iyan,” diin ni Luistro.

Tinukoy ng mambabatas mula Batangas ang mga naunang legal na hakbang ng kampo ni Duterte bilang batayan ng kanilang inaasahang pagtutol.

“Bilang katunayan, naaalala ninyo noong pagdinig sa Justice Committee, nagsampa sila ng kasong kriminal laban sa amin dahil umano sa paglabag sa pagiging kumpidensyal na itinatadhana ng Anti-Money Laundering Act,” paggunita ni Luistro.

“Iyon din ang panahon na naghain sila ng petisyon sa Quezon City Regional Trial Court kaugnay ng pagbubunyag ng mga transaksiyon ng Anti-Money Laundering Council (AMLC),” dagdag niya.

Ayon kay Luistro, matagal nang bahagi ng mga legal na argumento sa mga kaugnay na kaso ang usapin ng pagiging kumpidensyal ng mga rekord ng bangko at AMLC.

“At kung susuriin ninyo ang mga isyung inilahad sa mga petisyong isinampa sa Korte Suprema, kabilang din doon ang pagiging kumpidensyal ng mga bank transaction at AMLC transaction,” aniya.

“Kaya sa ngayon pa lamang, inaasahan na namin na haharap kami sa hamong iyan sa paglalatag ng ebidensya tungkol sa unexplained wealth,” dagdag pa niya.

Kinumpirma rin ni Luistro na bahagi pa rin ng mga ebidensyang nais makuha ng prosekusyon ang mga dokumento ng bangko at testimonya ng mga kinatawan ng bangko, kahit wala pa ang mga ito sa kanilang aktuwal na pag-iingat.

“Ang masasabi ko lamang ay matagal na naming binabanggit ang mga bank documents at mga kinatawan ng bangko, kahit na hanggang ngayon ay wala pa ang mga ito sa aming pagmamay-ari o kustodiya,” sabi ni Luistro.

Naisumite na ng House prosecution panel ang kanilang pre-trial brief sa Senado bilang impeachment court, habang nakatakdang magsimula ang aktuwal na paglilitis sa Hulyo 6.