INAASAHAN na mas marami pang pribadong piskal ang sasama sa House prosecution team bago ang pagbubukas ng impeachment trial ni Vice President Sara Z. Duterte sa Hulyo 6, habang naghahanap ang panel ng mga abogado na kapareho ng kanilang paninindigan sa pananagutan, handang maglingkod nang libre (pro bono), at may sapat na kakayahan upang tumulong sa paghahanda para sa paglilitis.

Ginawa ni lead prosecutor at House Committee on Justice Chairperson Rep. Gerville “Jinky Bitrics” Luistro ng Batangas ang pahayag habang kinukumpirma na patuloy na may mga abogado na nag-aalok ng tulong sa prosecution panel.

“Totoo naman ‘yun. The private prosecutors keep on coming to join the impeachment team and we’re happy about that because that is a validation that even private lawyers, mga abogado de campanilla, believe in the cause of the House of Representatives,” ani Luistro.

“Sumasama sila sa aming paninindigan upang protektahan, pangalagaan at ipatupad ang mekanismo ng pananagutan,” dagdag niya.

Nauna nang ipinakilala ng House prosecution team ang unang grupo ng 10 pribadong abogado na tutulong sa 11 pampublikong piskal sa impeachment trial.

Ayon kay Luistro, maaaring ipakilala na rin sa loob ng linggong ito ang susunod na grupo ng mga pribadong abogado, ngunit lahat ng pormal na sasama sa kaso ay dapat maiprisinta bago magsimula ang paglilitis.

“Tingnan natin ngayong linggo kung maaari na nating ipakilala ang susunod na batch, pero tiyak na lahat sila ay maipapakilala bago magsimula ang ating paglilitis sa Hulyo 6,” sabi ni Luistro.

Ipinaliwanag ng lead prosecutor na ang pinakamainam na bilang ng mga pribadong piskal na haharap sa impeachment court ay katumbas ng bilang ng mga pampublikong piskal.

“Ideally, dapat pareho ang bilang nila sa public prosecutors. Tandaan ninyo, labing-isa kami,” paliwanag ni Luistro.

“Kaya sa ideal na sitwasyon, labing-isa rin ang pribadong piskal. Sampu na ang naipakilala namin,” dagdag niya.

Nilinaw ni Luistro na kahit ang mga abogadong hindi pormal na haharap sa impeachment court ay maaari pa ring tumulong sa paghahanda ng kaso.

“Ngunit tiyak na ang mga hindi mag-e-enter ng appearance sa impeachment court ay mananatiling bahagi ng team dahil napakahalaga ng paghahanda bago ang paglilitis,” aniya.

Kasalukuyang naghahanda ang House prosecution team para sa pre-trial conference sa Hunyo 18, kung saan tatalakayin ang mga saksi, ebidensya at iba pang usaping pang-proseso bago ang aktuwal na paglilitis.

Ayon kay Luistro, tatlong pangunahing salik ang isinasaalang-alang ng prosecution panel sa pagtanggap ng mga pribadong abogado sa kanilang hanay.

“Una sa lahat, dapat pareho nila ang aming paninindigan, hindi ba?

Pangalawa, dapat ay pro bono sila dahil walang pondo para bayaran ng mga public prosecutors,” ani Luistro.

Ang ikatlong rekisito, ayon kay Luistro, ay propesyonal na kakayahan, lalo na’t mangangailangan ang impeachment trial ng legal research, paghahanda ng ebidensya, paghawak sa mga saksi, at pagharap sa korte.

“At pangatlo, siyempre, isinasaalang-alang namin ang kanilang kakayahan. At batay sa unang batch, nakita naman ninyo na pawang mga kilalang at batikang abogado ang mga pribadong piskal na sumali sa prosecution team,” dagdag ni Luistro.