𝗦𝗜𝗡𝗨𝗦𝗨𝗣𝗢𝗥𝗧𝗔𝗛𝗔𝗡 𝗻𝗶 𝗢𝗙𝗪 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗠𝗮𝗿𝗶𝘀𝘀𝗮 “𝗗𝗲𝗹 𝗠𝗮𝗿” 𝗣. 𝗠𝗮𝗴𝘀𝗶𝗻𝗼 𝗮𝗻𝗴 𝗻𝗮𝗴𝗶𝗻𝗴 𝗽𝗮𝗻𝗶𝗻𝗶𝗻𝗱𝗶𝗴𝗮𝗻 𝗻𝗴 𝗴𝗼𝗯𝘆𝗲𝗿𝗻𝗼 𝗺𝗮𝘁𝗮𝗽𝗼𝘀 𝗶𝘁𝗼𝗻𝗴 𝗺𝗮𝗴𝗽𝗮𝘁𝘂𝗽𝗮𝗱 𝗻𝗴 𝘁𝗼𝘁𝗮𝗹 𝗯𝗮𝗻 𝗹𝗮𝗯𝗮𝗻 𝘀𝗮 𝗣𝗵𝗶𝗹𝗶𝗽𝗽𝗶𝗻𝗲 𝗢𝗳𝗳𝘀𝗵𝗼𝗿𝗲 𝗚𝗮𝗺𝗶𝗻𝗴 𝗢𝗽𝗲𝗿𝗮𝘁𝗼𝗿𝘀 (𝗣𝗢𝗚𝗢) 𝘀𝗮 𝗣𝗶𝗹𝗶𝗽𝗶𝗻𝗮𝘀.

Ang ibinigay na reaksiyon ni Magsino ay kasunod ng naging surpresang anunsiyo ni President Ferdinand “Bongbong” R. Marcos, Jr. sa kaniyang ikatlong State of the Nation Address (SONA) noong nakaraang Lunes (July 22) na mula sa araw na iyon ay ipatutupad na ng pamahalaan ang total ban laban sa operasyon ng POGO.

Binigyang diin ni Magsino na nararapat lamang na panindigan ng pamahalaan ang total ban laban sa POGO bunsod ng samu’t-saring usapin na nakakulapol dito kabilang na ang bentahan ng illegal drugs, human trafficking, torture, mga pagpatay at iba pa.

Ayon kay Magsino, noon pa man ay naninindigan na siya laban sa operasyon ng POGO sa Pilipinas matapos itong ipabatid sa kaniyang privilege speech sa Plenaryo ng Kamara de Representantes noong Disyembre 4, 2023 ang mariing pagtutol nito sa POGO na prente o front ng human trafficking at iba pang mga illegal activities.

Wala aniyang kabuluhan ang milyon pisong nakukuha ng gobyerno mula sa operasyon ng POGO kung ang nasasakripisyo naman ang katahimikan ng bansa at ang kaligtasan mismo ng mamamayang Pilipino.

Ikinatuwiran pa nito na hindi aniya matatawaran ang “social costs” na dulot ng iba’t-ibang krimen na kinasasangkutan ng POGO sapagkat wala umanong katapat na halaga o salapi ang kaligtasan at kapakanan ng mamamayang Pilipino.

“Kaya’t suportado natin ang POGO ban. Ito ay mahalaga sa pananatili ng kapayapaan, kaayusan at karangalan ng ating bayan. Ating suportahan ang hakbang na ito ng ating Pangulong Bongbong Marcos upang matiyak ang mas maliwanag, maayos at makatarungang kinabukasan para sa mga Pilipino,” pahayag ni Magsino.
____________