NATAGPUAN ang bangkay ng 35-anyos na massage therapist na palutang-lutang sa Tullahan River sa Quezon City noong Sabado.

Kinilala ang biktima na si alyas Marlon, ng Macopa St., Area 5, Brgy. Capri, Novaliches, Quezon City.

Sa ulat ng Criminal Investigation and Detection Unit ng Quezon City Police District (QCPD), alas-6:30 ng umaga ng madiskubre ang bangkay ng biktima sa nasabing ilog sa Atlas Road, Brgy. Nagkaisang Nayon, Novaliches, Quezon City.

Batay sa imbestigasyon ni P/Cpl Nestor Ariz Jr., isang saksi ang nakakita sa biktima na nakalutang kaya inireport sa pulisya.

Lumalabas sa karagdagang imbestigasyon na nakuhanan ng CCTV footage ang biktima na tumalon sa ilog at ilang minuto ang lumipas lumutang na ang bangkay.