KINUWESTYON ng tagapagsalita ng prosekusyon ng Kamara de Representantes ang kredibilidad ng mga saksi na iniharap ng pangkat ng depensa ni Bise Presidente Sara Z. Duterte.

Ayon sa kanya, ang personal at propesyonal na ugnayan ng mga saksi sa pamilya Duterte ay nagdudulot ng pagdududa sa kanilang pagiging patas at walang kinikilingan.

Sinabi ni Lanao del Sur Rep. Zia Alonto Adiong na ilan sa mga saksi ng depensa ay mga dating itinalaga sa mga posisyon sa pamahalaan, kasosyo sa negosyo, o matagal nang kaibigan ni Duterte at ng kanyang asawang si Atty. Manases Carpio.

“Lahat po ay mga may kinikilingang saksi. Kaya naman sinuri sa korte ang kanilang kredibilidad,” pahayag ni Alonto Adiong sa panayam sa kanya ni Korina Sanchez-Roxas sa programang “Memo” ng Bilyonaryo News Channel.

Kabilang sa mga tinutukoy niya sina Davao City Assessor Jaime Adalin, abogado Suzette Balucanag-Punay, abogado Anel Martin Antero, at Chadwin Parian.

Si Adalin, na nagsilbi sa ilalim ni Duterte noong alkalde pa ito ng Davao City, ay nagbigay ng testimonya tungkol sa isang ari-ariang nakarehistro sa pangalan ni Carpio na kinuwestiyon ng prosekusyon dahil umano sa hindi ito idineklara.

Si Punay, na nagsisilbing in-house counsel ng GenCorp Industries Inc. at Metro City Chow Foods Corp., ay nagbigay ng testimonya tungkol sa mga interes ni Duterte sa negosyo at sa buwanang bayad na natatanggap niya mula sa sangay ng GenCorp sa Times Square.

Samantala, sinubukan naman ni Antero, na matagal nang kaibigan ni Duterte, na ipaliwanag ang halagang P205,007 na ginastos sa isang hapunan sa Japan. Si Parian naman, na kaibigan ni Carpio, ay nagbigay ng testimonya tungkol sa pagbili ng mga produktong Nike na nagkakahalaga ng P256,882 sa Malaysia.

Inihambing ni Alonto Adiong ang mga saksi ng depensa sa mga saksi ng prosekusyon, na kinabibilangan ng mga opisyal ng pamahalaan at mga tagapangalaga ng opisyal na rekord pinansyal at pangkorporasyon.

Ayon kay Alonto Adiong, ang mga opisyal na ito ay pangunahing nagbigay ng testimonya batay sa mga dokumentong isinumite sa kanilang mga ahensiya, sa halip na batay sa kanilang personal na ugnayan sa bise presidente.

Sinabi rin niya na tila umiiwas sa pagsagot ang ilang saksi ng depensa nang harapin sila ng mahihirap na tanong mula sa mga senador-hukom.

“Kaya nga po parati, kapag sunod-sunod at madiin ang mga tanong sa kanila, ang lagi nilang ginagamit na paraan upang takasan ang mga tanong ng mga senador-hukom ay ang pagsasabing ‘hindi ko alam, hindi ko matandaan, hindi ko maalala,’” ani Adiong.

Binigyang-diin niya na mahalaga ang kredibilidad dahil kailangang matukoy ng impeachment court kung nagsasabi ng katotohanan ang mga saksi.

Iginiit ni Alonto Adiong na dapat sumagot nang tapat at malinaw ang mga saksi sa halip na pili lamang ang impormasyong ibinubunyag nila upang paboran ang depensa.

Sinimulan ng pangkat ng depensa ang paghaharap ng kanilang mga ebidensiya noong Nobyembre 9 upang kuwestiyunin ang mga natuklasan ng prosekusyon hinggil sa umano’y hindi maipaliwanag na yaman na nagkakahalaga ng hindi bababa sa P817.87 milyon.

Nakatakdang ipagpatuloy ng Senado na nagsisilbing impeachment court ang mga pagdinig sa Nobyembre 19 at 20.