INAASAHANG magsisilbing Clerk of Court ng Senate Impeachment Court ang bagong itinalagang Senate Secretary na si Jose Luis G. Montales, kaya magkakaroon siya ng mahalagang papel sa impeachment proceedings laban kay Vice President Sara Duterte.

Ayon sa Senado, pangangasiwaan ni Montales ang court records, proceedings, documentation at iba pang gawaing administratibo na may kaugnayan sa impeachment case.

Pinanumpa ni Senate President Alan Peter Cayetano si Montales sa plenary session ng Senado matapos magtipon ang Senado bilang impeachment court para sa proceedings sa Articles of Impeachment na ipinadala ng House of Representatives.

Nagsilbi si Montales bilang Undersecretary for Civilian Security and Consular Concerns sa Department of Foreign Affairs mula June 30, 2017 hanggang October 2018.

Naging Secretary General din siya ng House of Representatives noong termino ni Cayetano bilang Speaker mula July 22, 2019 hanggang October 12, 2020.

Bago siya italaga sa Senado, nagsilbi rin si Montales bilang City Administrator ng Taguig City.

Pormal nang nagtipon ang Senado bilang impeachment court upang dinggin ang Articles of Impeachment laban kay Duterte, habang nanumpa ang mga senator-judge na paiiralin ang impartial justice alinsunod sa Konstitusyon at mga batas ng Pilipinas.

Bilang inaasahang Clerk of Court, tutulong si Montales sa pangangasiwa ng records, notices, documentation at iba pang gawaing administratibo habang sumusulong ang impeachment court sa mga susunod na yugto ng kaso.