SAN JOSE CITY–Nalunod sa irrigation canal o patubig ang isang magsasaka sa syudad na ito nang aksidenteng mahulog nang buksan ang checkgate ng irigasyon noong Huwebes.

Ayon kay P/Lt.Col. Erwin Ferry, chief of police ng syudad, nahulog si alyas Lito, 37, dakong alas-5:30 ng hapon sa NIA irrigation canal sa Zone 6 ng Brgy. Camanacsacan, San Jose City.

Iginagayak umano ng biktima ang kanyang sakahing lupa nang pumunta sa irrigation drop para ayusin pero nadulas at nahulog sa tubig.

Naiahon siya sa patubig ng mga rumespondeng bumbero at naisugod sa Ospital ng Lungsod ng San Jose subalit idineklarang dead-on-arrival dakong alas-6:45 ng gabi.