ARESTADO ang feeling siga na lalaki sa Valenzuela City at nakumpiska ng mga pulis ang baril na laging bitbit nito para makapanakot tuwing malalasing.

Iniutos ni Valenzuela Police chief P/Col Nixon Cayaban na siyasatin kung may katotohanan ang sumbong sa kinaugalian ng suspek na si alyas Jay-ar na palaging nagwawasiwas ng baril sa kanilang lugar sa Brgy. Malinta kapag lasing.

Nang mapatunayang totoo ang sumbong, nag-apply ng search warrant si P/Lt. Michael Dela Cruz, deputy commander ng substation-4, sa sala ni Valenzuela Regional Trial Court (RTC) Presiding Judge Lilia Mercedes Encarnacion Gepty ng Branch 75.

Alas-10:05 ng umaga ng Lunes nang ipatupad ng mga tauhan ni Col. Cayaban ang search warrant sa bahay ni alyas Jay-ar sa 341 Dulong Tangke St. at nakuha sa ilalim ng mesa sa kanyang silid ang hindi lisensiyadong kalibre .38 revolver na kargado ng dalawang bala.

Inaresto ng mga pulis si Jay-ar na ngayo’y nahaharap sa kasong paglabag sa RA 10591 (Comprehensive Law on Firearms and Ammunition Act) sa Valenzuela City Prosecutor’s Office.