NAGSAMPA noong Huwebes ng hapon ang Office of the Ombudsman ng mga kasong plunder at graft laban kay Sen. Jose “Jinggoy” Estrada at ilan pang iba sa Sandiganbayan, isang hakbang na maaaring magbukas ng daan sa kanilang posibleng pag-aresto.

Nadawit si Estrada sa kontrobersiya matapos ibunyag ni dating DPWH-Bulacan District Engineer Brice Hernandez na tumanggap umano ang senador ng kickback mula sa mga proyektong flood control, na itinanggi naman ni Estrada.

“Basta ang alam ko… wala akong insertion na katulad ng sinasabi nila. Nang ibinulgar ni Brice Hernandez sa House na meron akong insertion… wala silang record na ako ay may insertion na ganoong halaga,” naunang sinabi ni Estrada.

Personal na isinampa ni Assistant Ombudsman Mico Clavano ang mga kaso sa Sandiganbayan noong Huwebes ng hapon.

Nauna nang sinabi ni Clavano na umiikot ang mga alegasyon sa umano’y pakikipagsabwatan ng mga respondent upang impluwensiyahan ang alokasyon ng pondo, manipulahin ang public bidding, at magbulsa ng pondo ng gobyerno mula sa mahahalagang pambansang proyekto sa imprastraktura.

Kabilang din sa mga respondent si dating DPWH Secretary Manuel Bonoan kasama ang ilang engineering officials mula sa NCR.

Ang pinakahuling kasong ito ang ikatlong plunder charge na isinampa laban kay Estrada, anak ni dating Pangulong Joseph Estrada.

Ang plunder ay isang kasong hindi maaaring piyansahan at may parusang habambuhay na pagkakakulong. Maaari lamang payagan ang piyansa kung matutukoy ng hukuman na hindi matibay ang ebidensiya ng pagkakasala.

Ayon sa mga source ng korte, agad na ipaparaffle ang mga kaso sa pitong dibisyon ng anti-graft court hanggang sa oras ng paglalathala nitong Huwebes.

Noong Mayo 26, 2026, ibinunyag ni Ombudsman Jesus Crispin Remulla na inirekomenda ng special panel of investigators ang pagsasampa ng kasong kriminal laban sa senador at iba pang respondent kaugnay ng multi-bilyong pisong kontrobersiya sa flood control.

Unang sinampahan si Estrada noong 2001 bilang co-accused ng kanyang ama kaugnay ng umano’y jueteng payola operations. Kalaunan ay napawalang-sala siya noong 2007.

Sinampahan din siya ng kaso noong 2014 kaugnay ng Priority Development Assistance Fund (PDAF) scam, ngunit kalaunan ay napawalang-sala rin noong 2024 dahil sa kakulangan ng ebidensiya.