INIULAT ng Civil Aviation Authority of the Philippines (CAAP) ang maayos at organisadong operasyon sa lahat ng paliparang pinamamahalaan nito sa panahon ng pagpapatupad ng Oplan Biyaheng Ayos: Semana Santa 2026 mula Marso 28 hanggang Abril 5.

Sa kabila ng bahagyang pagtaas ng bilang ng mga pasahero na lumampas sa inaasahang bilang, nanatiling mahusay at maayos ang operasyon ng mga paliparan sa buong Semana Santa.

Naitala ng mga paliparang pinamamahalaan ng CAAP ang kabuuang 564,890 pasahero.

Ang pinakamataas na bilang ng pasahero ay naitala sa mga sumusunod na paliparan:

• Davao International Airport – 112,322 pasahero
• Iloilo International Airport – 70,932 pasahero
• Bacolod-Silay Airport – 51,530 pasahero
• Puerto Princesa International Airport – 48,340 pasahero
• Daniel Z. Romualdez Airport – 37,868 pasahero

Ipinagkaloob ng CAAP ang tagumpay ng Semana Santa operations sa mas pinaigting na koordinasyon ng mga tauhan sa paliparan, mga airline partners, at iba pang ahensya ng pamahalaan, gayundin sa kooperasyon ng mga biyahero.

“Lubos naming ipinapaabot ang pasasalamat sa aming masisipag na tauhan sa paliparan na nagtiyak ng ligtas, maayos, at episyenteng operasyon sa gitna ng dagsa ng mga biyahero ngayong Semana Santa. Nagpapasalamat din kami sa publiko sa kanilang pasensya, pang-unawa, at kooperasyon na malaking nakatulong upang maging maayos ang daloy ng biyahe sa panahong ito,” pahayag ni CAAP Director General Retired Lt. Gen. Raul del Rosario.

Muling tiniyak ng CAAP ang patuloy na pagpapabuti ng serbisyo sa paliparan, pagpapatatag ng kahandaan sa operasyon, at pagbibigay ng ligtas, maayos, at walang abalang karanasan sa lahat ng pasahero sa panahon ng peak travel at sa mga susunod pang pagkakataon, alinsunod sa direktiba ni Pangulong Ferdinand Marcos Jr. at Kalihim ng Transportasyon Giovanni Lopez.