KAMPO HENERAL MALVAR, Batangas City–Bagsak sa malamig na rehas ang dalawang itinuturing na high-value individual (HVI) matapos makumpiskahan ng mahigit P2 milyon na halaga ng shabu sa Brgy. Poblacion, Malvar, Batangas.

Ang mga suspek na sina alyas Dennie, 32; at Rea, 30, ay naaresto ng mga operatiba ng Provincial Drug Enforcement Unit (PDEU) at Malvar police, ayon kay Batangas police director PCol. Oliver Ebora.

Nakuha sa mga suspek ang 303.3 na gramo ng shabu na nagkakahalaga ng P2.04 milyon, boodle money, cash, dalawang cellphone at puting Nissan Terra.

Nahaharap sa kasong paglabag sa RA 9165 (Comprehensive Dangerous Drugs Act of 2002) ang 2 suspek.