NANAWAGAN si Pangulong Ferdinand R. Marcos Jr. ng mas pinalawak na kalakalan at kooperasyon sa pagitan ng Association of Southeast Asian Nations (ASEAN) at ng Gulf Cooperation Council (GCC) upang maisakatuparan ang kanilang kolektibong layunin para sa napapanatiling kaunlaran.

Sa kanyang talumpati sa 2nd ASEAN-GCC Summit na ginanap sa Kuala Lumpur, Malaysia, binigyang-diin ng Pangulo ang kahalagahan ng estratehikong ugnayan ng ASEAN at GCC, at hinimok ang mga lider na talakayin ang mga isyung pandaigdig gaya ng kapayapaan, kalayaan sa paglalayag at internasyonal na batas, pagbabago ng klima, at karapatan ng mga migranteng manggagawa.

“Bagamat may malakas na potensyal, malinaw din na nananatiling limitado ang ating kasalukuyang mga kalakalan, na nakatuon lamang sa iilang sektor,” ani Pangulong Marcos.

“Upang mapakinabangan natin ang buong potensyal ng ating ugnayan, kailangan nating lumampas sa tradisyonal na kalakalan at gamitin ang ating magkatuwang na lakas.”

Ayon sa Pangulo, ang ASEAN ay may lumalawak na digital economy at kabataang bihasa sa teknolohiya, samantalang ang GCC ay may kakayahang mamuno sa sektor ng enerhiya, pamumuhunan, at imprastraktura ng lohistika — isang perpektong kombinasyon para sa kapwa kapaki-pakinabang na ugnayan.

“Sama-sama tayong makakalikha ng matatag na supply chains, mga solusyong pang-enerhiya na napapanatili, at mga inobasyong magtataguyod ng kaunlaran,” dagdag niya.

Binanggit din ng Pangulo ang halal trade, harmonization ng mga pamantayan, pati na rin ang paglawak ng e-commerce at digital trade bilang mga susi sa mas malalim na ugnayan.

Tinukoy rin ni Pangulong Marcos ang South China Sea at Arabian Sea bilang mahalagang daanan ng kalakal.

“Mahalagang panatilihin ang kalayaan sa paglalayag, matiyak ang malayang daloy ng kalakalan, at mapangalagaan ang karagatan, ayon sa **United Nations Convention on the Law of the Sea (UNCLOS),” aniya.

Binigyang-diin rin niya ang kahalagahan ng pagbibigay ng oportunidad sa pagtaas ng kakayahan (upskilling) at proteksyon sa karapatan at kapakanan ng humigit-kumulang 2.7 milyong manggagawang mula sa ASEAN na nasa GCC, kung saan mahigit 2 milyon ay mga overseas Filipino workers (OFWs).

Pinasalamatan din ni Pangulong Marcos ang GCC at mga miyembrong estado nito sa kanilang pagkilos tungo sa kapayapaan, at muling ipinaabot ang pag-aalala ng Pilipinas sa nagpapatuloy na krisis sa Gaza dahil sa operasyong militar ng Israel.

“Lubos na nababahala ang Pilipinas sa patuloy na kaguluhan at krisis pang-humanitarian sa Gaza,” ani ng Pangulo.