IMINUNGKAHI ng grupo ng mga mambabatas mula Camarines Sur noong Linggo na dapat gamitin ng administrasyong Marcos ang precast concrete at iba pang makabagong teknolohiya sa konstruksyon upang matugunan ang malaking kakulangan sa pabahay sa bansa.

Layunin din nitong bawasan ang gastos at oras ng paggawa ng mga bahay habang isinusulong ang isang low-carbon economy.

Sa ilalim ng House Bill (HB) No. 2511, isinusulong ng mga Bicolanong mambabatas na sina Reps. Migz Villafuerte, Luigi Villafuerte, Tsuyoshi Anthony Horibata, at Terry Ridon (Bicol Saro partylist) ang pagpasa ng isang batas na tatawaging “National Precast and Industrialized Construction Promotion Act.” Layunin nitong palakasin ang kakayahan ng pamahalaan na solusyunan ang kakulangan sa pabahay, mga pagkaantala sa konstruksyon, at mataas na gastos sa tradisyonal na paraan ng pagtatayo.

Ayon sa mga mambabatas, ang paggamit ng precast concrete at industrialized construction techniques ay mas mabilis, episyente, matibay, at mas makakalikasan, lalo na sa pagtugon sa kakulangan sa pabahay na umabot na sa 8.25 milyong yunit noong Marso 2025.

Sabi ni Rep. Migz Villafuerte, layunin ng panukala na pasimplehin ang proseso ng konstruksyon sa pamamagitan ng paggawa ng precast at prefabricated components upang mapabilis ang pagtatayo ng mga bahay at iba pang estruktura.

Dagdag pa ni Rep. Luigi Villafuerte, makakatulong din ito upang mabawasan ang carbon emissions sa konstruksyon at mas kaunting basura sa mismong lugar ng proyekto, alinsunod sa mga pandaigdigang pamantayan ng green building.

Mga insentibong nakasaad sa HB 2511:

Mabilisang paglalabas ng building permits mula sa LGUs; Tax breaks at duty-free privileges para sa mga negosyong gagamit ng precast technologies; Green financing na may mababang interes mula sa DBP, LandBank, at Pag-IBIG; at BOI incentives tulad ng VAT exemption para sa mga rehistradong precast manufacturers.

Itatatag din ang isang National Committee on Industrialized Construction (NCIC) na bubuuin ng mga kinatawan mula sa DPWH, DOTr, DHSUD, at Department of Economy, Planning and Development (DepDev). Gagampanan ng komiteng ito ang: Pagbabantay sa mga precast at prefabrication enterprise;

Pagsusuri ng mga polisiya at panukalang pondo; at Pakikipag-ugnayan sa mga banyagang institusyon para sa teknolohiya at pagsasanay.

Ayon sa mga mambabatas, ang batas ay napapanahon at mahalaga dahil: Mapapaliit ang kakulangan sa pabahay – kahit aktibo ang gobyerno sa mga proyekto, nananatili pa rin ang malaking agwat dahil sa urbanisasyon at migrasyon sa mga lungsod.

Mas mabilis at mas mura ang konstruksyon – sa paggamit ng precast, mas mabilis ang paggawa, mas maikli ang oras ng proyekto, at mas mababa ang gastos sa labor.

Mas matibay at environment-friendly – kontrolado ang kalidad ng mga materyales at mas kaunti ang basura.

Binigyang-diin din ng mga Villafuertes, Horibata at Ridon na kahit mas mataas ang initial investment ng precast system, malaki ang matitipid sa mahabang panahon dahil mas mabilis ang proyekto, mas konti ang maintenance, at mas mataas ang kalidad.

Pang-ekonomiyang benepisyo:

Magkakaroon ng mas maraming trabaho sa sektor ng konstruksyon,

Mapapalakas ang lokal na produksyon ng precast components,

Mas makakaakit ng mga dayuhang mamumuhunan,

Makakatulong sa pagsunod sa green building goals ng bansa.

Global na inspirasyon:

Ang mga bansang gaya ng U.S., U.K., Germany, China, at ilang Asia-Pacific countries ay malawakang gumagamit na ng precast at modular construction sa kanilang infrastructure boom.

Nais din ng panukalang batas na magpatupad ng pambansang pamantayan para sa paggamit ng mga teknolohiyang ito, kagaya ng ginagawa sa India at Singapore.

Halimbawa ng implementasyon:

Ang Camarines Sur, sa ilalim ng pamumuno nina Migz at Luigi Villafuerte, ang kauna-unahang probinsya na nakipagsosyo sa DHSUD para sa isang 4PH mass housing project. Noong 2023, sinimulan ang konstruksyon ng 10,000 high-rise units sa Naga City — ang pinakamataas na gusali sa Bicol.

Mga pangunahing konsepto:

Prefabricated construction – mga bahagi ng gusali na ginawa sa pabrika, tapos dadalhin sa site para buuin.

Modular construction – buong bahagi ng gusali (tulad ng kwarto) ang ginagawa sa pabrika at inia-assemble na lang on-site.

Industrialized construction – paggamit ng teknolohiya gaya ng robotics at Building Information Modeling (BIM) para gawing mas episyente ang paggawa.

Precast construction – paggawa ng concrete components (hal. haligi, panel) sa labas ng site gamit ang molde bago ito i-install.

Sakop ng panukala ang mga proyekto ng national government agencies, LGUs, GOCCs, PPPs, at mga pribadong developer na may insentibo mula sa gobyerno para sa pabahay, turismo, at imprastruktura.

Inaatasan nito ang DHSUD at NHA na unahin ang paggamit ng precast at industrialized construction sa lahat ng housing projects, pati na rin ang DPWH at DOTr sa mga pampublikong proyekto gaya ng tulay, terminal, daanan, at iba pa.