ISANG pulis sa Davao City ang inaresto at nakakulong ngayon matapos umanong barilin at patayin ang isang 39-anyos na negosyante bandang alas-11 ng gabi nitong Linggo.

Ayon kay Davao City Police Office Director, Colonel Hansel M. Marantan, ang suspek ay isang police corporal na nakatalaga sa Police Station 15 sa Ecoland. Siya ay naaresto kaugnay ng insidente ng pamamaril na naganap sa harap ng Korean Town BBQ na matatagpuan sa Palma Gil Street, Barangay 13-B.

Ang biktima, na residente ng Barangay Anglionto, ay nagtamo ng dalawang tama ng bala at binawian ng buhay habang isinusugod sa isang lokal na ospital. Patuloy pa ring inaalam ang motibo sa likod ng krimen sa oras ng pagsulat ng ulat.

Batay sa imbestigasyon, ang biktima at ang suspek ay kapwa nasa loob ng isang itim na Mitsubishi pick-up na nakaparada sa kalsada nang biglang makarinig ng dalawang putok ng baril mula sa loob ng sasakyan.

Kinilala ng mga saksi ang pulis na lumabas ng sasakyan at lumakad palayo na parang walang nangyari. Ilang sandali pa’y lumabas ang sugatang biktima mula sa pick-up at agad na dinala sa pinakamalapit na ospital, kung saan siya ay idineklarang dead on arrival ng doktor.

Sa ulat ni Col. Marantan kay Police Regional Office 11 Director, Brigadier General Leon Victor Z. Rosete, kinilala ang suspek ng mga saksi sa pamamagitan ng mga larawan na ipinakita ng mga rumespondeng pulis.