SINABI ni Senate President Sherwin Gatchalian na ang Senate impeachment court ang magpapasya kung paano hahawakan ang sealed box ng Bureau of Internal Revenue na naglalaman ng tax records sa impeachment trial ni Vice President Sara Duterte.

Ayon kay Gatchalian, walang hiwalay na pre-trial conference para sa BIR box, na inilarawan sa report bilang naglalaman ng tax records ni Duterte at ng kanyang asawa na si Atty. Manases Carpio.

“Yung BIR box will be left to the impeachment court to decide. When the time comes, I’m sure in prosecution, pag-iteration, then we’ll decide on that matter,” sinabi ni Gatchalian.

Nang tanungin kung ang BIR box ang unang tatalakayin sa pagbubukas ng trial sa Hulyo 6, sinabi ni Gatchalian, “No, not necessarily.”

Nauna nang inilabas ng Senate impeachment court ang pre-trial order sa prosecution at defense, at binigyan ang magkabilang panig hanggang Hulyo 2 upang magsumite ng komento.

Inaasahang magsisilbing gabay sa proceedings ang pre-trial order at nakapaloob dito ang listahan ng mga testigo, marked evidence, trial dates, at iba pang detalye.

Nagtala ang prosecution ng 57 testigo, habang 45 naman ang inilista ng defense. Mayroon ding 17 common witnesses. Hindi pinangalanan ang ilang testigo dahil sa seguridad.

Ininspeksyon din ni Gatchalian ang Senate session hall at committee rooms bago ang trial at sinabing handa na ang Senado sa proceedings.

“We’re very prepared. Handa na tayo,” sinabi ni Gatchalian.

Nakaayos na ang mga upuan para sa senator-judges, prosecution team, at defense team, habang naihanda na rin ang witness stand.

Ininspeksyon din ng Senado ang committee rooms na gagamitin ng prosecution, defense, at media.

Nakatakdang magsimula ang impeachment trial sa Hulyo 6, alas-2 ng hapon, at unang idaraos mula Lunes hanggang Miyerkules.

Walang trial sa Hulyo 27, ang araw ng State of the Nation Address ng Pangulo.

Pagkatapos ng SONA, inaasahang lilipat ang trial sa alas-3 ng hapon tuwing Martes hanggang Huwebes.

Dahil limitado ang espasyo, 150 miyembro lamang ng publiko ang papayagang makapasok sa session hall. Kailangang magrehistro sa Senate visitor management system, at ang approval ay first-come, first-served.

Nananatili sa heightened security ang Senado, bagama’t ibinaba na ang security level upang payagan ang pagpasok ng mga bisita.

Sinabi ni House prosecutor Rep. Terry Ridon na maaaring suriin ang BIR box sa open session sa halip na sa executive session.

Tumanggi naman si defense spokesperson Atty. Michael Poa na kumpirmahin kung hiniling ng defense na suriin ang box sa executive session, at sinabing bawal silang magtalakay sa publiko ng kaso at maingat silang sumusunod sa rules.

Inaasahang tatalakayin ng Senate impeachment court ang paghawak sa BIR box kapag naihain na ang usapin sa trial.