INAASAHANG muling tatalakayin sa Lunes ng impeachment court ng Senado ang mga kahilingang maglabas ng subpoena para sa bank, tax at anti-money-laundering records ni Vice President Sara Duterte.

Sinabi ni Senator-judge Erwin Tulfo sa panayam sa DZMM na hindi natapos ng korte ang pagtalakay sa mga kahilingan.

“Sa Lunes natatalakay ang issue tungkol sa mga subpoena, iyong subpoena sa AMLC, bank account at BIR records ng Vice President. Hindi kami natapos ng discussion. Iyan ang pag-uusapan ulit ng Lunes,” sabi ni Tulfo.

Hinihiling ng prosekusyon na ilabas ng Bureau of Internal Revenue, Anti-Money Laundering Council at mga institusyong pinansyal ang mga rekord na sinasabi nitong mahalaga sa kaso.

Ayon sa mga prosecutor, maaaring makatulong ang mga dokumento sa pagtunton sa perang kaugnay ng mga alegasyon laban kay Duterte.

Tinutulan ito ng depensa. Kinuwestiyon nito ang saklaw at kaugnayan ng mga rekord, pati ang pagsunod sa privacy at confidentiality laws.

Nauna nang nagdala ang BIR sa korte ng isang sealed box na naglalaman ng mga tax record na hinihingi ng prosekusyon. Ibinalik ito ng korte nang hindi binubuksan habang pinag-aaralan ng mga senator-judge ang mga argumento ng magkabilang panig.

Ang subpoena ay mag-uutos lamang na ilabas ang mga dokumento. Hindi nito mapatutunayang may ginawang mali si Duterte.

Maaari pa ring kuwestiyunin ng depensa ang mga rekord kapag iniharap ang mga ito bilang ebidensya.

Sinabi ni Tulfo na hindi pa siya nagpapasya at nais muna niyang marinig ang mga argumento ng mga pabor at tutol sa mga kahilingan.

“Nais po natin marinig ang mga paliwanag kung bakit kontra at pabor. So titingnan po natin,” aniya sa parehong panayam sa DZMM.

Kailangan pang magpasya ang korte kung ilalabas ang mga subpoena at kung gaano kalawak ang saklaw ng mga ito.