𝗡𝗔𝗡𝗔𝗡𝗔𝗪𝗔𝗚𝗔𝗡 𝘀𝗶 𝗛𝗼𝘂𝘀𝗲 𝗔𝘀𝘀𝗶𝘀𝘁𝗮𝗻𝘁 𝗠𝗶𝗻𝗼𝗿𝗶𝘁𝘆 𝗟𝗲𝗮𝗱𝗲𝗿 𝗮𝘁 𝗕𝗮𝘀𝗶𝗹𝗮𝗻 𝗟𝗼𝗻𝗲 𝗗𝗶𝘀𝘁. 𝗖𝗼𝗻𝗴. 𝗠𝘂𝗷𝗶𝘃 𝗦. 𝗛𝗮𝘁𝗮𝗺𝗮𝗻 𝗸𝗮𝘆 𝗣𝗿𝗲𝘀𝗶𝗱𝗲𝗻𝘁 𝗙𝗲𝗿𝗱𝗶𝗻𝗮𝗻𝗱 “𝗕𝗼𝗻𝗴𝗯𝗼𝗻𝗴” 𝗥. 𝗠𝗮𝗿𝗰𝗼𝘀,𝗝𝗿. 𝘂𝗽𝗮𝗻𝗴 𝗺𝗮𝗴𝗽𝗮𝘁𝘂𝗽𝗮𝗱 𝗻𝗴 “𝘀𝘂𝗯𝘀𝗶𝗱𝘆” 𝗮𝗻𝗴 𝗴𝗼𝗯𝘆𝗲𝗿𝗻𝗼 𝗽𝗮𝗿𝗮 𝗺𝗮𝘁𝘂𝗹𝘂𝗻𝗴𝗮𝗻 𝗮𝗻𝗴 𝗺𝗴𝗮 𝗺𝗮𝗵𝗶𝗵𝗶𝗿𝗮𝗽 𝗻𝗮 𝗺𝗮𝗴𝘀𝗮𝘀𝗮𝗸𝗮 𝗻𝗮 𝗺𝗮𝗹𝗶𝗶𝘁 𝗹𝗮𝗺𝗮𝗻𝗴 𝗮𝗻𝗴 𝗸𝗮𝗻𝗶𝗹𝗮𝗻𝗴 𝗸𝗶𝗻𝗶𝗸𝗶𝘁𝗮 𝗸𝗮𝘀𝘂𝗻𝗼𝗱 𝗻𝗴 𝗽𝗮𝗴𝗯𝗮𝗯𝗮 𝗻𝗴 𝗶𝗽𝗶𝗻𝗮𝗽𝗮𝘁𝗮𝘄 𝗻𝗮 𝘁𝗮𝗿𝗶𝗽𝗮.

Kasabay nito, nananawagan din si Hataman sa gobyerno na magkaroon ng karagdagan sa ipinamamahaging financial subsidy para sa tatlong milyong magsasaka matapos ang napagkasunduang pagtapyas sa taripang ipinapataw sa bigas mula sa 35% patungo sa 15% para maibaba ang presyo ng bigas sa P29,00 kada kilo.

Ipinaliwanag ni Hataman na kapag ibinaba aniya ang presyo ng bigas sa merkado sa halagang P29 kilo baka hindi umano makasabay ang mga magsasaka at maaaring hindi narin sila makabenta.

Sinabi rin ni Hataman na kasulukuyang masusing pinag-aaralan ng kaniyang tanggapan ang paghahain ng panukalang batas sa Kamara de Representantes para magkaroon ng proteksiyon ang mga maliliit na magsasaka sa pamamagitan ng karagdagang subsidy para sa kanila.

“With this, I call on the government to increase financial subsidies to our rice farmers. Isama din sana sila sa mga ayuda ng pamahalaan at iba pang programa para sa mahihirap,” sabi ni Hataman.

Binigyang diin pa ng kongresista na ang Pilipinas ay isang “agricultural country” kung kaya’t ang magsasaka ay umaasa sa bigas na inaani sa Pilipinas gayong hindi naman sila aniya maaaring umasa sa rice imports o mga bigas na inaangkat sa ibang bansa.

Kaugnay nito, hinihiling din ni Hataman sa administrasyong Marcos,Jr. na i-prioritize ang mga local farmers sa oras na bumibili ng bigas ang gobyerno o kinakailangang maging national policy.

Nauna rito, umasa din si Hataman na agad na mararamdaman ng mamamayang Pilipino partikukar na ang mahihirap na pamilya ang epekto ng ginawang pagbabawas sa taripang ipinapataw sa mga imported na bigas.