NATIMBOG ng mga ahente ng National Bureau of Investigation – Homicide Division (NBI-HD) noong Abril 21 si alyas Ambo dahil sa pisikal at sikolohikal na pang-aabuso sa 7-taong gulang na bata.

Nag-ugat ang kaso sa mga ulat ng mga kamag-anak at sinuportahan ng mga account at komunikasyon ng saksi na nagpapakita ng pattern ng pananakit at pananakot na ginawa sa menor-de-edad habang nasa ilalim ng kustodiya ng suspek.

Natunton ng mga operatiba ng NBI-HD ang suspek sa Dasmariñas City, Cavite sa tulong ng mga awtoridad.

Sumailalim sa inquest proceedings ang suspek na nagbibigay daan para sa agarang pagsasampa ng mga kaso.

Ang mga ebidensyang nakalap ay nagtatatag ng posibleng dahilan para sa paglabag sa RA 7610 (Special Protection of Children Against Abuse, Exploitation and Discrimination Act) na sumasaklaw sa mga gawaing pang-aabuso sa bata, kalupitan, at pagsasamantala.

Binibigyang-diin ng NBI ang kanilang zero tolerance para sa mga krimen laban sa mga bata at tinitiyak sa publiko na ang mga nagkasala ay hahabulin nang walang humpay at ganap na mananagot sa ilalim ng batas.