APAT na most wanted person sa bansa, kabilang ang bise alkalde ng Marantao, Lanao del Sur na nahaharap sa kasong murder at frustrated murder na walang piyansa, ang nahuli ng mga tauhan ng Philippine National Police (PNP), ayon sa inihayag ni PNP chief General Jose Melencio C. Nartatez Jr. nitong Sabado.

Ang 36-anyos na bise alkalde ay naaresto sa loob ng isang motel sa Barangay San Miguel, bayan ng Marantao, kung saan siya ay nakalistang ikatlong most wanted person sa lalawigan at numero unong most wanted sa munisipyo.

Itinuturing din siyang ikaapat na most wanted person sa Northern Mindanao. Inaresto siya ng mga miyembro ng Iligan City Mobile Force Company batay sa mga warrant of arrest na inisyu ng Initao Regional Trial Court sa Misamis Oriental.

“Ang posisyon sa gobyerno ay hindi nagbibigay ng proteksyon laban sa pananagutan. Kapag may warrant of arrest, ipatutupad ito ng ating mga pulis alinsunod sa batas at tamang proseso,” sabi ni Gen. Nartatez.

Ang ikalawang suspek na may alyas na “Tarzan/Tarsan,” 45, ay inaresto ng mga miyembro ng PNP Intelligence Group sa pamumuno ni Brig. Gen. David N. Poklay, kasama ang Police Regional Office 12 sa ilalim ni Brig. Gen. Alan B. Manibog, sa Barangay Udtong at Lambayong, Sultan Kudarat noong Biyernes.

Isa siya sa mga most wanted person sa Pilipinas na may P145,000 pabuya mula sa Department of the Interior and Local Government (DILG) noong Hulyo 31. Nahaharap siya sa mga warrant para sa dalawang bilang ng murder at paglabag sa Republic Act No. 11479 o Anti-Terrorism Act of 2020. Wala ring inirerekomendang piyansa para sa kanyang kaso ayon sa korte sa Sultan Kudarat.

Hinahanap ang suspek dahil sa umano’y papel niya sa pambobomba sa Isulan Integrated Public Terminal sa Barangay Kalawag 2, bayan ng Isulan, noong Abril 17, 2023, na ikinasugat ng maraming residente kabilang ang tatlong menor de edad.

Iniuugnay rin siya sa pagpatay sa isang 60-anyos na miyembro ng Barangay Peacekeeping Action Team (BPAT) sa Lambayong noong Hulyo 17, 2021, at sa pagpatay sa isa pang miyembro ng BPAT sa parehong lugar noong Abril 7 ng kaparehong taon.

Habang inaaresto, marahas na nanlaban ang suspek at nakipagpalitan ng putok sa mga pulis. Dahil dito, tinamaan siya ng bala sa kaliwang tuhod at agad dinala sa isang lokal na ospital para sa gamutan habang binabantayan ng mga pulis.

Nakuha mula sa kanyang pag-aari ang isang caliber 9mm semi-automatic pistol na may bala sa chamber at magazine na naglalaman ng tatlong buhay na bala. Napag-alamang nakapagpaputok siya ng hindi bababa sa tatlong beses laban sa mga umaarestong pulis bago siya tuluyang napasuko.

“Ang terorismo at pagpatay ay tumatama sa mismong pundasyon ng kaligtasan ng publiko at buhay ng tao. Ang mga akusado sa ganitong mabibigat na krimen ay hindi maaaring asahang makakaiwas sa batas—hahanapin sila ng PNP, aarestuhin, at ihaharap sa mga hukuman,” sabi ni Gen. Nartatez.

Ang dalawa pang most wanted person ay natunton sa kanilang pinagtataguan sa Davao del Sur at Leyte noong Miyerkules.

Ang suspek na naaresto sa Barangay Kimlawis, Kiblawan, Davao del Sur ay itinuring na ikalawang most wanted person sa Davao Region. Ayon kay PRO11 director Brig. Gen. Leon Victor Z. Rosete, mayroon itong warrant of arrest para sa kasong murder na walang piyansa.

Ang ikaapat na suspek na naaresto sa Palompon, Leyte ay may warrant of arrest para sa limang bilang ng qualified rape laban sa isang menor de edad na inisyu ng lokal na hukuman.