MATAPOS makumpleto ng Senate impeachment court ang mga pagdinig sa pre-trial, nagpahayag nitong Biyernes ang House prosecution panel ng kumpiyansa na wala nang anumang hadlang sa pagsisimula ng impeachment trial ni Bise Presidente Sara Z. Duterte sa Hulyo 6.

Tinapos ng Senado nitong Huwebes ang pre-trial conference matapos ang limang araw ng pagdinig na nakatuon sa pagresolba sa mga usaping pang-proseso at pag-aayos ng mga dokumentaryong ebidensya bago ang pormal na paglalahad ng kaso.

Para kay House impeachment spokesperson at Kinatawan ng Lanao del Sur na si Zia Alonto Adiong, ang pagkumpleto ng prosesong ito ay nangangahulugang wala nang natitirang balakid sa pagsisimula ng pormal na paglilitis.

“Ang pagtatapos po ng pre-trial conference ay isang malaking hudyat na wala pong maaaring hadlang sa pag-umpisa ng actual impeachment trial sa nalalapit na Hulyo 6 na naaayon sa ating Saligang Batas,” ani Alonto Adiong sa isang press conference sa pamamagitan ng Zoom.

Sinabi ng mambabatas na naghahanda na ngayon ang prosekusyon na isumite ang kanilang mga komento matapos ang pagtatapos ng pre-trial conference.

“Kakatapos lang po ng pre-trial conference kahapon at nakahanda ang prosecution na magsumite ng kanilang mga komento,” aniya.

Samantala, sinabi ni House legal spokesperson Benjamin “Jay” Tolosa Jr. na ginugol ng prosekusyon ang limang araw upang kumpletuhin ang mga kinakailangang hakbang sa pre-trial, kabilang ang pagmamarka ng mga dokumentaryong ebidensya, pagtukoy sa mga testigo, pagsusumite ng mga mungkahing stipulasyon, at paggawa ng mga kinakailangang pahayag sa impeachment court.

“Ang magandang balita ay matapos makumpleto ang pre-trial proceedings, nakatakda nang magsimula ang impeachment trial sa Hulyo 6,” ani Tolosa.

Ayon sa kanya, mahalagang yugto ang pagtatapos ng pre-trial dahil nagbibigay ito ng daan upang magpatuloy ang prosesong itinakda ng Konstitusyon at mabigyan ang publiko ng pagkakataong marinig mismo ang mga ebidensya.

“Malugod naming tinatanggap ang mahalagang hakbang na ito dahil nagbibigay-daan ito sa pagpapatuloy ng prosesong konstitusyonal at nagbibigay sa sambayanang Pilipino ng pagkakataong marinig ang mga ebidensya, suriin ang mga katotohanan, at malaman ang katotohanan sa pamamagitan ng isang patas, malinaw, at maayos na paglilitis,” aniya.

Nagpasalamat din si Tolosa sa Secretariat ng Senate impeachment court, na aniya’y naging malaking tulong upang makumpleto ng magkabilang panig ang proseso sa kabila ng napakaraming ebidensya, kabilang ang libu-libong dokumentaryong exhibit na may kaugnayan sa mga artikulo ng impeachment, mga alegasyon ng hindi maipaliwanag na yaman, at confidential funds.

“Taos-puso kaming nagpapasalamat sa Secretariat ng Impeachment Court sa kanilang gabay at mga tulong na ibinigay sa magkabilang panig, na naging dahilan upang makumpleto namin ang malawak na prosesong ito sa kabila ng libu-libong dokumentaryong ebidensya, lalo na ang may kaugnayan sa mga artikulo ng impeachment, unexplained wealth, at confidential funds,” ani Tolosa.

Sa nalalabing sampung araw bago ang itinakdang pagsisimula ng paglilitis, sinabi ni Alonto Adiong na malapit nang marinig, makita, at masuri ng Senado, bilang impeachment court, ang mga ebidensya ng magkabilang panig alinsunod sa prinsipyo ng due process.

“Sampung araw na lang po ang natitira upang ang Senado na uupong hukom ay maririnig, makikita, at masusuri ang ebidensya ng bawat panig na naaayon sa prinsipyo ng due process,” aniya.

Idinagdag ni Alonto Adiong na ang paglilitis sa Hulyo 6 ang magiging unang pagkakataon para sa prosekusyon na iharap sa publiko ang mga ebidensyang sumusuporta sa impeachment complaint, at iginiit niyang nararapat lamang na malaman ng sambayanang Pilipino ang katotohanan.

“Ang taumbayan po ay nakikinig, nagbabantay, at nagmamatyag. Karapat-dapat silang malaman ang katotohanan at pawang katotohanan lamang. At iyan po ang panata ng prosecution team—ang ilatag ang katotohanan at pawang katotohanan lamang sa sambayanang Pilipino sa nalalapit na paglilitis kay Bise Presidente Sara Duterte,” ani Alonto Adiong.