INAPRUBAHAN ng Senado sa second reading ang panukalang nagdedeklara sa Waling-Waling bilang pambansang orchid ng Pilipinas

Layunin ng Senate Bill No. 2092 na kilalanin ang Waling-Waling bilang pambansang orchid ng Pilipinas dahil sa halaga nito sa kultura at kalikasan.

Isinulong ni Sen. Loren Legarda ang panukala.

Sinabi ng mga senador na makatutulong ang bill sakaling maisabatas upang palawakin ang kaalaman ng publiko tungkol sa orchid.

Iniuugnay ang Waling-Waling sa Mindanao at itinuturing na isa sa pinakamahalagang orchid sa Pilipinas.

Sa plenary discussion, binanggit ng mga senador ang pangangailangang protektahan ang bulaklak laban sa biodiversity poaching at palakasin ang mga hakbang sa konserbasyon para sa mga katutubo at endemic na halaman.

Sinuportahan ni Sen. Juan Miguel “Migz” Zubiri ang panukala.

“Making the Waling-Waling a national orchid would at least protect it from biodiversity poaching,” sabi ni Zubiri.

Tinalakay ang panukala sa isang sesyon na kinabilangan din ng committee reorganization, privilege speeches, mga panukala sa agrikultura at pangisdaan at iba pang nakabinbing panukala.

Kailangan pang aprubahan ang panukala sa third reading bago maipadala sa House of Representatives.