INANUNSYO ng Bureau of Immigration (BI) ang pag-aresto sa dalawang South Koreans na wanted sa kanilang bansa dahil sa pagkakasangkot sa malawakang fraud.

Sa ulat kay Immigration Commissioner Jaime Morente, kinilala ng Fugitive Search Unit (FSU) ng BI ang mga dayuhang pugante na sina Son Hyungjun, 36, at Choi Jong Bok, 40, na naaresto noong Martes sa magkahiwalay na operasyon na isinagawa ng unit sa Pampanga.

Sinabi ni BI-FSU acting chief Rendel Ryan Sy na si Son, na naaresto sa Angeles City, ay na-tag bilang miyembro ng telecommunications fraud syndicate na nanloko sa mga biktima nito ng mahigit 22 milyong Korean won, o halos US$18,000.

Si Son, na napapailalim sa warrant of arrest mula sa Busan District Court sa South Korea, at ang kanyang mga kasamahan ay umano’y isinagawa ang kanilang panlilinlang mula sa kanilang headquarters sa China kung saan tumawag sila sa kanilang mga biktima sa Korea sa pamamagitan ng voice phishing.

Sa kabilang banda, si Choi, na naaresto sa Porac, Pampanga, ay pinaghahanap umano dahil sa panlilinlang sa isang kababayan na mahigit P7 milyon sa isang mapanlinlang na stock investment scheme.

Ang isang warrant para sa pag-aresto kay Choi ay inilabas ng Nambu District Court sa Seoul kung saan siya ay kinasuhan ng panloloko.

Sinabi ni Sy na ang mga pasaporte ng dalawang South Koreans ay binawi na, kaya sila ngayon ay itinuturing na mga undocumented alien na mananagot para sa agarang deportasyon.

Sa pagsuri sa kanilang travel records, napag-alaman din na pareho na silang nag-o-overstay dahil nagtatago sila sa bansa mula nang huli silang dumating dito bilang turista noong 2018.

Kasalukuyang nakakulong ang dalawa sa BI Warden Facility sa Camp Bagong Diwa, Taguig City habang nakabinbin ang deportation proceedings. Kasama si Joanne Rosario, OJT.