ISANG 30-anyos na service crew ng isang food chain ang dinukot umano ng dalawang hindi pa nakikilalang lalaki sakay ng berdeng van habang pababa ang biktima mula sa pampasaherong jeepney Martes ng gabi sa highway ng Barangay Dila, Bay, Laguna.

Sa inisyal na ulat na isinumite ni Police Major Jameson Aguilar, Officer-in-Charge (OIC) ng Bay Police Station (PS) ay sinabi na ang biktima ay kinilalang si Maylen Maulion, at residente ng Bgy. Dila, Bay, Laguna.

Nangyari ang umano’y pagdukot dakong alas-10:35 ng gabi. matapos ireport ng isang barangay tanod ang insidente sa Bay PS.

Sinabi ng isang saksi na ang biktima ay dinukot ng dalawang hindi pa nakikilalang mga suspek sakay ng isang berdeng van na may huling digit na numero 938 at pilit itong pinasakay sa service van.

Matapos ang insidente, agad na tumakas ang mga suspek patungo sa Sta. Cruz, Laguna direksyon.

Hindi pa malinaw sa oras ng press ang motibo ng pagdukot ng mga suspek habang nagsasagawa pa ng dragnet operation ang pulisya para sa posibleng pag-aresto. kasama si Blessie Amor, OJT